කැනඩාවේ විවිධ ප්‍රදේශවල අහසේ හිටිහැටියේ දර්ශනය වූ අමුතුම ආකාරයේ කේතුවක් වැනි ආලෝක ධාරාවන් කිහිපයක් හේතුවෙන් එරට වැසියන් දැඩි මවිතයකට පත් වූහ. බොහෝ දෙනා මෙය පිටසක්වල යානයක පැමිණීමක් ලෙස සැක කරමින් සමාජ මාධ්‍ය තුළ වීඩියෝ සහ ඡායාරූප ප්‍රචාරය කළ අතර, ඒ පිළිබඳව පවතින කුතුහලය දුරු කිරීමට විද්‍යාඥයන් සහ අභ්‍යවකාශ විශේෂඥයන් දැන් ඉදිරිපත් වී තිබේ.
මෙම ආලෝක ධාරාවන් අතිශය දීප්තිමත් වූ අතර, ඒවා අහසේ එක් ස්ථානයක සිට තවත් ස්ථානයකට සෙමින් ගමන් කරන ආකාරය නිරීක්ෂණය විය. විශේෂඥයන් පෙන්වා දෙන්නේ මෙය කිසිසේත්ම පිටසක්වල ජීවීන්ගේ ක්‍රියාවක් නොව, මෑතකදී අභ්‍යවකාශයට මුදා හරින ලද රොකට්ටුවක අවශේෂ හෝ එහි ඉන්ධන දහනය වීමේදී ඇතිවන දෘශ්‍ය සංසිද්ධියක් බවයි. විශේෂයෙන්ම මස්ක්ගේ ‘SpaceX’ වැනි සමාගම් විසින් සිදුකරන චන්ද්‍රිකා දියත් කිරීම්වලදී මෙවැනි ආලෝක රටාවන් ඇතිවීම සාමාන්‍ය තත්ත්වයක් බව ඔවුහු පවසති.
අභ්‍යවකාශ විද්‍යාඥයින් පැහැදිලි කරන්නේ, රොකට්ටුවක් වායුගෝලයේ ඉහළ ස්ථරවලට ළඟා වන විට එහි එන්ජිමෙන් පිටවන වායූන් අධික ශීතල සහ අඩු පීඩනය යටතේ ව්‍යාප්ත වන බවයි. හිරු බැස ගිය පසුවත් ඉහළ අහසේ පවතින සූර්යාලෝකය මෙම වායු ධාරාවන් මත පතිත වීම නිසා පෘථිවියේ සිට බලන්නෙකුට එය ඉතා දීප්තිමත් කේතුකාකාර ආලෝකයක් ලෙස දර්ශනය වේ. මෙය “අභ්‍යවකාශ ජෙලිෆිෂ්” ලෙසද ජනප්‍රිය ව්‍යවහාරයේ හැඳින්වේ.
මෙම සංසිද්ධිය කැනඩාවේ ඔන්ටාරියෝ සහ ක්විබෙක් වැනි ප්‍රදේශවලට ඉතා පැහැදිලිව දර්ශනය වී ඇති අතර තාක්ෂණයේ දියුණුවත් සමඟ නිරන්තරයෙන් සිදුවන චන්ද්‍රිකා සහ රොකට් දියත් කිරීම් නිසා ඉදිරියේදී මෙවැනි අභිරහස් ආලෝකයන් අහසේ දැකීම සාමාන්‍ය සිදුවීමක් වනු ඇති බවටද විද්‍යාඥයෝ අනාවැකි පළ කරති.
0 Comments