ජපානයේ ටෝකියෝ නගරයට ආසන්න චිබා ප්‍රාන්තයට ඇදහැළුණු පෙර නොවූ විරූ මට්ටමේ අධික වර්ෂාවක් හේතුවෙන් පුද්ගලයන් අට දෙනෙකු ජීවිතක්ෂයට පත්ව ඇති අතර, දැවැන්ත ගංවතුර තත්ත්වය හේතුවෙන් දහස් ගණනකගේ දෛනික කටයුතු මුළුමනින්ම අඩාල වී තිබේ. මාර්ග සහ දුම්රිය සේවා බිඳවැටීමත් සමඟ නරිටා ජාත්‍යන්තර ගුවන් තොටුපළේ මගීන් දහස් ගණනකට ගුවන් තොටුපළ තුළම රාත්‍රිය ගත කිරීමට සිදුව තිබේ.
අගෝස්තු 13 වැනිදා රාත්‍රියේ ආරම්භ වූ මෙම දැඩි වර්ෂාවත් සමඟ චිබා ප්‍රාන්තයේ ප්‍රදේශ රැසක් ක්ෂණික ගංවතුරට යටවිය. ඇතැම් ප්‍රදේශවල පැය 24ක් තුළ මිලිමීටර් 360කට වැඩි වර්ෂාපතනයක් වාර්තා වී ඇති අතර, චිබා නගරයේ පැය 24කදී මිලිමීටර් 367ක වර්ෂාවක් ලැබී තිබේ. එය 2013 ඔක්තෝබර් මාසයේදී වාර්තා වූ මිලිමීටර් 309ක පෙර වාර්තාවද ඉක්මවා යාමකි.

ගංවතුර සහ ඒ ආශ්‍රිත අනතුරු හේතුවෙන් මියගිය පිරිසට ඉචිකාවා නගරයේ ගංවතුරට යට වූ මාර්ගයකදී සොයාගත් වයස අවුරුදු 60–70 අතර පිරිමි පුද්ගලයෙකු සහ සකුරා නගරයේදී තම මෝටර් රථය ගංවතුරට හසුවීමෙන් මියගිය 66 හැවිරිදි කාන්තාවක්ද ඇතුළත් වේ. තවත් මරණ කිහිපයක්ද ගංවතුරෙන් යට වූ වාහන හා අයහපත් කාලගුණ තත්ත්වය සමඟ සම්බන්ධ වී තිබේ.

චිබා ආණ්ඩුකාර Toshihito Kumagai මෙම වර්ෂා තත්ත්වය තමන් මෙතෙක් දැක ඇති ස්වාභාවික ආපදා තත්ත්වයන් අතර අසාමාන්‍ය මට්ටමේ සිදුවීමක් ලෙස විස්තර කර තිබේ. සහන හා ගලවා ගැනීමේ කටයුතු සඳහා ජපාන ආරක්ෂක හමුදා ඇතුළු ආපදා කළමනාකරණ කණ්ඩායම් යොදවා ඇත.

මේ අතර, රටේ කාර්යබහුල සංචාරක සමයක සිදුවූ මෙම ආපදාව නරිටා ජාත්‍යන්තර ගුවන් තොටුපළටද දැඩි බලපෑමක් එල්ල කර තිබේ. දුම්රිය හා මාර්ග සම්බන්ධතා බිඳවැටීම හේතුවෙන් මගීන් 7,000කට ආසන්න පිරිසක් ගුවන් තොටුපළේ රාත්‍රිය ගත කර ඇති අතර, ඔවුන් සඳහා ආහාර, ජලය සහ නිදාගැනීමට අවශ්‍ය පහසුකම් සැලසීමට ගුවන් තොටුපළ බලධාරීන් කටයුතු කර තිබේ. ඇතැම් මගීන්ට හෝටල් වෙත පවා ගමන් කිරීමට නොහැකි වී තිබිණි.

ගංවතුර හේතුවෙන් මහාමාර්ග කිහිපයක් වසා දැමුණු අතර දුම්රිය සේවා රැසක්ද අත්හිටුවනු ලැබීය. විදුලි උපපොළකට වැසි ජලය ඇතුළුවීමෙන් නිවාස 20,000කට වැඩි සංඛ්‍යාවකට විදුලිය අහිමි වූ අතර, තවත් පවුල් දහස් ගණනකට ගෑස් සැපයුමද තාවකාලිකව නතර කිරීමට සිදුවිය.
ජපාන කාලගුණ විද්‍යා ඒජන්සිය චිබා ප්‍රාන්තයේ ප්‍රදේශ රැසකට අධික වැසි සහ නායයෑම් පිළිබඳ ඉහළ මට්ටමේ අනතුරු ඇඟවීම් නිකුත් කළේය. වර්ෂාව ක්‍රමයෙන් අඩුවෙමින් පැවතියද, පස ජලයෙන් සංතෘප්ත වීම සහ ගංගා ජල මට්ටම් ඉහළ යාම හේතුවෙන් ගංවතුර හා නායයෑම් අවදානම තවදුරටත් පැවතිණි.

මෙම සිදුවීම ජපානයේ ආන්තික කාලගුණික තත්ත්වයන් සම්බන්ධයෙන්ද යළි අවධානය යොමු කර තිබේ. වාර්තාගත වර්ෂාපතනයෙන් සිදුවූ මරණ, ප්‍රවාහන සේවා බිඳවැටීම, විදුලි හා ගෑස් සැපයුම්වලට සිදුවූ බලපෑම් සහ දහස් ගණනක් ජනතාවට මුහුණදීමට සිදුවූ අපහසුතා, මෙම ආපදාවේ බරපතළත්වය පැහැදිලි කරන ප්‍රධාන කරුණු බවට පත්ව තිබේ.