නවසීලන්තයේ පාසල් සිසුන් රෝගාබාධ නිසා පන්ති කාමරවලට පැමිණීමෙන් වැළකී සිටීම පසුගිය වසර තුන තුළ වාර්තා වූ ඉහළම අගයට පැමිණ තිබේ. එරට අධ්‍යාපන අමාත්‍යාංශය (Ministry of Education) නිකුත් කළ නවතම දත්තවලට අනුව, සිසුන් පාසල් නො පැමිණීමට ප්‍රධානතම හේතුව වී ඇත්තේ කෙටිකාලීන රෝගාබාධයි. නිසි හේතුවක් නොමැතිව පාසල් නොපැමිණීම (truancy) වෙනුවට මෙසේ අසනීප වීම ප්‍රධාන හේතුව බවට පත්වීම, ශිෂ්‍ය පැමිණීම 80% මට්ටම දක්වා ඉහළ නැංවීමට එරට රජය ගෙන යන වැඩපිළිවෙළට විශාල අභියෝගයක් එල්ල කර ඇත.

මෙම තත්ත්වය හමුවේ දෙමාපියන් මෙන්ම පාසල් බලධාරීන් ද දැඩි අර්බුදයකට මුහුණ දී සිටිති. එක් පසෙකින් පාසල් පැමිණීම ඉහළ නැංවීමට උත්සාහ කරන අතරතුර, අසනීපයෙන් පසුවන දරුවන් අන් අයට රෝග බෝවීම වැළැක්වීම සඳහා නිවෙස්වල තබා ගන්නා ලෙස ද විදුහල්පතිවරුන් උපදෙස් දෙති. සෘතුමය ඉන්ෆ්ලුවෙන්සා සහ ශ්වසන පද්ධතිය ආශ්‍රිත රෝග ව්‍යාප්තිය නිසා පන්ති කාමර පිටින්ම මෙන්ම ගුරුවරුන් ද නිවෙස්වල නිරෝධායනය වීමට සිදුවීම අධ්‍යාපන කටයුතුවලට බාධාවක් වී තිබේ.

අධ්‍යාපන නියෝජ්‍ය අමාත්‍ය ඩේවිඩ් සීමෝර් (David Seymour) පෙන්වා දෙන්නේ 2020 වසරේ සිට මේ දක්වා සෞඛ්‍ය හේතූන් මත පාසල් නොපැමිණෙන සංඛ්‍යාව දෙගුණයකින් වැඩි වී ඇති බවයි. නිසි හේතුවක් මත නිවසේ රැඳී සිටීම සහ නිකරුණේ පාසල් නොපැමිණීම අතර පැහැදිලි වෙනසක් හඳුනාගත යුතු බව බලධාරීන් පවසයි. පසුගිය කාලයේ රජය විසින් අතපසු වූ සිසුන් නැවත පාසල් වෙත ගෙන්නා ගැනීමට ඩොලර් මිලියන ගණනක විශේෂ ව්‍යාපෘති දියත් කළ ද, අසනීප තත්ත්වයන් නිසා සිදුවන නොපැමිණීම් සඳහා වෙනස්ම ප්‍රවේශයක් අවශ්‍ය බව අධ්‍යාපන විශේෂඥයෝ අවධාරණය කරති.