නවසීලන්ත අගමැතිට එරෙහිව දැවැන්ත ජන රැල්ලක්! විරෝධතාවයේ සියලු තොරතුරු මෙන්න…

සංරක්ෂිත ඉඩම් සංවර්ධන ව්‍යාපෘති සඳහා විවෘත කිරීමට නවසීලන්ත රජය ගෙන ඒමට සූදානම් වන නව පරිසර පනතට එරෙහිව දහස් සංඛ්‍යාත ජනතාවක් Auckland නගර මධ්‍යයට රැස්වී දැවැන්ත විරෝධතාවක නිරත වූහ. Greenpeace පරිසර සංවිධානය සහ Forest & Bird සංවිධානය එක්ව සංවිධානය කළ මෙම විරෝධතා පාගමන සඳහා 35,000කට ආසන්න පිරිසක් සහභාගී වූ බව සංවිධායකයෝ පවසති. කෙසේ වෙතත්, පොලිස් වාර්තාවලට අනුව එහි සිටි උපරිම පිරිස 6,000ක් පමණ වන අතර, කිසිදු අර්බුදයකින් තොරව විරෝධතාව ඉතා සාමකාමීව පැවැත්විණි.

රජය යෝජනා කරන පරිසර සංරක්ෂණ සංශෝධන පනත් කෙටුම්පත (Conservation Amendment Bill) මගින් රක්ෂිත ඉඩම් පුද්ගලික සහ වාණිජමය කටයුතු සඳහා පැවරීමට මෙන්ම පරිසර ආරක්ෂණ නීති ලිහිල් කිරීමට ඉඩකඩ සැලසෙන බවට විරෝධතාකරුවෝ චෝදනා කරති. අගමැති Christopher Luxon ප්‍රමුඛ රජයට දැඩි ලෙස අනතුරු අඟවමින් ග්‍රීන්පීස් විධායක අධ්‍යක්ෂ Dr Russel Norman කියා සිටියේ, කෙටිකාලීන ලාභ උදෙසා රටේ රක්ෂිත ඉඩම් විනාශ කිරීමට ඉඩ නොදෙන බවත්, පරිසරය සුරැකීමට ජනතාව ඕනෑම මොහොතක සූදානම් බවත්ය. සංරක්ෂිත ඉඩම් කළමනාකරණය නූතනකරණය කිරීම සහ සංවර්ධන කටයුතු පහසු කිරීම රජයේ අරමුණ බව පැවසුවද, මෙම පනත මගින් පරිසර පද්ධතියට දැඩි තර්ජනයක් එල්ල වන බව පරිසරවේදීන්ගේ මතය වී ඇත.