නවසීලන්තයේ ප්‍රමුඛ පෙළේ සුපිරි වෙළඳසැල් ජාලයක් වන Woolworths සමාගමට, ඩුනීඩින් දකුණු ප්‍රදේශයේ පිහිටි තම වෙළඳසැලක මී ගැටලුවක් නිසි ලෙස පාලනය නොකිරීම හේතුවෙන් ඩොලර් 33,000 ක දඩයක් නියම කර ඇත. මෙම සිදුවීම ආහාර ආරක්ෂාව පිළිබඳ දැඩි සැලකිල්ලක් ඇති කර ඇති අතර, විශාල සමාගම්වල වගකීම් පිළිබඳ ප්‍රශ්නද නැවත ඉදිරියට ගෙන එයි.
මෙම ගැටලුව 2023 වසරේ අවසාන කාලයේ ආරම්භ වූ අතර, වෙළඳසැල තුළ මීයන් නිතර දැක ඇති බව වාර්තා වී ඇත. සේවකයින් විසින් මෙම සිදුවීම් වාර්තා කරමින් සිටියත්, එය සමාගම තුළ ඉහළ මට්ටමට (food safety team) වේලාවට ඉදිරිපත් නොකළ බව හෙළිවී ඇත. මේ හේතුවෙන් ගැටලුව දිගටම වැඩිවී ගොස් ඇත.
2023 ඔක්තෝබර් සිට දෙසැම්බර් දක්වා කාලය තුළ පමණක් මීයන් සිටින බවට තහවුරු වීම් 112කට අධික සංඛ්‍යාවක් ලියාපදිංචි වී තිබේ. තත්ත්වය බරපතල වූ හෙයින්, 2024 පෙබරවාරි මාසයේදී මෙම වෙළඳසැල දින 18ක් සඳහා වසා දැමීමට සිදු වූ අතර, එම කාලය තුළ මීයන් 23කට අධික ප්‍රමාණයක් අල්ලා ඇත.
අධිකරණයේදී සඳහන් වුණේ, Woolworths සමාගම ආහාර පනත (Food Act) යටතේ තම වගකීම් නිසි ලෙස ඉටු නොකළ බවයි. ගැටලුව මුල් අවධියේදීම නිසි ලෙස විසඳා නොගැනීම “පද්ධතිමය අසාර්ථකත්වයක්” (systemic failure) ලෙස විස්තර කර ඇත. නීතිඥයා සඳහන් කළේ, පාරිභෝගිකයන් අසනීප වූ බවට සාක්ෂි නොමැති නමුත්, මෙම තත්ත්වය මහජන සෞඛ්‍යයට බරපතල අවදානමක් ඇති කළ බවයි.
සමාගම මෙම වරද පිළිගෙන සමාව ඉල්ලා ඇති අතර, ඉදිරියට මෙවැනි සිදුවීම් වලක්වා ගැනීමට නව ආරක්ෂණ ක්‍රම, සේවක පුහුණුව සහ මීයන් පාලන ක්‍රම ශක්තිමත් කර ඇති බව පවසයි.
0 Comments