📍 ආර්ජන්ටිනාවේ සිට යාත්රා කළ සුඛෝපභෝගී විනෝද චාරිකා නෞකාවක (Cruise ship) හටගත් හන්ටා වයිරසය ව්යාප්තිය මේ වන විට ලෝක සෞඛ්ය බලධාරීන්ගේ දැඩි අවධානයට ලක්ව තිබේ. මේ වන විට එම නෞකාවේ ගමන් කළ මගීන් තිදෙනෙකු ජීවිතක්ෂයට පත්ව ඇති අතර තවත් කිහිප දෙනෙකු වෛද්ය ප්රතිකාර සඳහා යොමු කර ඇත.
📍 ලෝක සෞඛ්ය සංවිධානය (WHO) පවසන්නේ මෙය කොවිඩ් හෝ ඉන්ෆ්ලුවෙන්සා මෙන් මහා පරිමාණයෙන් පැතිරෙන වසංගතයක ආරම්භයක් නොවන බවයි. මෙම වයිරසය ප්රධාන වශයෙන් මීයන්ගෙන් මිනිසුන්ට බෝ වන අතර, ආසාදිත මීයන්ගේ මුත්රා, මලපහ හෝ කෙළ මගින් දූෂිත වූ වාතය ආශ්වාස කිරීමෙන් පුද්ගලයෙකුට රෝගය වැළඳිය හැකිය. නෞකාව තුළ ආසාදනය පැතිර ඇත්තේ ඉතා සමීපව ඇසුරු කළ පුද්ගලයන් අතර පමණක් බව බලධාරීන් විශ්වාස කරයි.
📍 හන්ටා වයිරසයේ රෝග ලක්ෂණ සාමාන්ය උණ රෝගයකට සමාන වේ. උණ, අධික තෙහෙට්ටුව, මාංශ පේශි වේදනාව මෙන්ම හුස්ම ගැනීමේ අපහසුව, බඩේ කැක්කුම, වමනය සහ පාචනය මෙහි මූලික ලක්ෂණ වේ. වයිරසයට නිරාවරණය වී සති දෙකක සිට හතරක කාලයක් ඇතුළත රෝග ලක්ෂණ මතු විය හැකි අතර, ඇතැම් විට එය මාසයකට වඩා කල් ගත විය හැකිය.
📍 මේ වන විට නෞකාවෙන් බැස ගිය මගීන් සොයා මහා පරිමාණ මෙහෙයුමක් ආරම්භ කර ඇති අතර, බ්රිතාන්යය වැනි රටවල් සිය පුරවැසියන්ට දින 45ක ස්වයං නිරෝධායනයක් නිර්දේශ කර තිබේ. කෙසේ වෙතත්, සාමාන්ය පොදු ස්ථාන, කාර්යාල හෝ පාසල් හරහා මෙම වයිරසය පැතිරීමේ අවදානම ඉතා අවම බව සෞඛ්ය විශේෂඥයෝ සහතික කරති.
📍 මියගිය තිදෙනා අතර ඕලන්ද ජාතික කාන්තාවක ද වන අතර ඇයගේ සැමියා ද මීට පෙර නෞකාව තුළදීම මියගොස් තිබුණි. දැනට නෞකාව ස්පාඤ්ඤයේ කැනරි දූපත් බලා යාත්රා කරමින් පවතින අතර, එහි සිටින ඉතිරි මගීන් සහ කාර්ය මණ්ඩලය විධිමත් පරීක්ෂාවකින් පසු සිය රටවල් බලා පිටත් කිරීමට සැලසුම් කර ඇත.
0 Comments