නවසීලන්ත පාර්ලිමේන්තු මන්ත්‍රීවරියකට ඇමතිවරුන්ගෙන් ප්‍රහාරයක්!

නවසීලන්ත පාර්ලිමේන්තුවේ ලාබාලතම මන්ත්‍රීවරිය වන Te Pāti Māori පක්ෂයේ Hana-Rāwhiti Maipi-Clarke විසින් කරන ලද ප්‍රකාශයක් හේතුවෙන් එරට දේශපාලන කරළිය දැඩි ලෙස උණුසුම් වී තිබේ. තමන්ගේ පාර්ලිමේන්තු වැඩකටයුතුවලින් 65%ක්ම කාලය වෙන් කරන්නේ බන්ධනාගාරගත කර සිටින මාඕරි තරුණයින් (rangatahi) බැලීමට සහ ඔවුන්ගේ සුවදුක් විමසීමට බව ඇය ප්‍රකාශ කර තිබුණි.

කෙසේ වෙතත්, රජයේ අමාත්‍යවරුන් විසින් මෙම ප්‍රකාශය දැඩි ලෙස ප්‍රතික්ෂේප කර ඇති අතර, ඔවුන් පවසන්නේ මෙය මන්ත්‍රීවරියගේ සම්පූර්ණ අසත්‍යය ප්‍රකාශයක් හෙවත් ඉංග්‍රීසි බසින් Porkies (පට්ටපල් බොරු) යනුවෙනුයි. බන්ධනාගාර සහ ළමා සුරැකුම් ආයතනවල නිල වාර්තා සහ ලේඛන පරීක්ෂා කිරීමේදී ඇය පවසන තරම් සංචාරයන් ප්‍රමාණයක් සිදුවී නොමැති බව ඇමතිවරුන් මෙහිදී පෙන්වා දෙති.

මේ අතර, මන්ත්‍රීවරියගේ පාර්ශවය පවසන්නේ ඇය නිල වශයෙන් පමණක් නොව, පුද්ගලික සහ සංස්කෘතික මට්ටමින් ද මෙම තරුණයින් වෙනුවෙන් පෙනී සිටින බැවින් ඒවා නිල ලේඛනවල සටහන් නොවිය හැකි බවයි.

කෙසේ වෙතත්, බදු ගෙවන්නන්ගේ මුදලින් වැටුප් ලබන මන්ත්‍රීවරියකගේ ප්‍රකාශයන්හි විනිවිදභාවයක් තිබිය යුතු බව පවසමින් විපක්ෂ කණ්ඩායම් මේ වන විට ඇයට එරෙහිව දැඩි විවේචන එල්ල කරමින් සිටී.