ලෝකප්‍රකට Ford සමාගම විසින් ධාවන පථයන් සඳහාම විශේෂයෙන් නිපදවන ලද, කාගේත් අවධානය දිනාගන්නා නවතම මෝටර් රථයක් නිල වශයෙන් කරළියට ඇවිත් තිබෙනවා. ඒ, සුපිරි මෝටර් රථ ධාවන තරඟ (Supercars Championship) වල ආභාෂය ලබා නිපදවූ Mustang Dark Horse විශේෂ සංස්කරණයයි.

ධාවන ඉංජිනේරුවන් විසින්ම සැලසුම් කර ඇති මෙම සුපිරි රථය, සාමාන්‍ය Dark Horse මාදිලිය සහ ඉහළම මට්ටමේ Mustang GTD සුපිරි රථය අතර පරතරය පියවීමට සමත්ව තිබෙනවා. වායුගති විද්‍යාව (Aerodynamics) උපරිමයෙන් භාවිත කරමින් නිපදවා ඇති මෙහි ඉදිරිපස වාතය ඇතුළු වන කොටස සාමාන්‍ය මාදිලියට වඩා 65% කින් විශාල කර ඇත්තේ එන්ජිම සිසිල් කිරීමේ හැකියාව ඉහළ නැංවීමටයි. මීට අමතරව කාබන් ෆයිබර් කොටස්, Brembo කාබන්-සෙරමික් බ්‍රේක් පද්ධතිය සහ Michelin Pilot Sport Cup2 R ටයර් මඟින් මෙයට ඉතා ඉහළ ධාවන කාර්යක්ෂමතාවක් ලබා දී තිබෙනවා. රථයේ බර අඩු කිරීම සඳහා මෙහි පසුපස අසුන් පවා ඉවත් කර ඇති අතර ඉදිරිපස සඳහා Recaro රේසිං අසුන් යොදා තිබෙනවා.

🔴 නවසීලන්ත ලෝලීන්ට සිහිනයක්ද?

කෙසේ වෙතත්, මෙම සුපිරි රථය මිලදී ගැනීමට බලාපොරොත්තුවෙන් සිටින නවසීලන්තයේ මෝටර් රථ ලෝලීන්ට නම් ලැබී ඇත්තේ කණගාටුදායක ආරංචියක්. මන්දයත්, මෙම සීමිත සංස්කරණයේ (Limited-run) ධාවන පථ සඳහාම වෙන්වූ විශේෂ රථය නවසීලන්ත වෙළඳපොළට නිකුත් නොකරන බව ෆෝඩ් සමාගම තහවුරු කර තිබීමයි.
එබැවින් නවසීලන්ත වැසියන්ට දැනට පවතින සාමාන්‍ය 7 වන පරම්පරාවේ Mustang රථවලින් සෑහීමකට පත්වීමට සිදුවනු ඇත. එහිදී සාමාන්‍ය GT Fastback රථයක් නවසීලන්ත ඩොලර් 94,990 කින් ආරම්භ වන අතර, මාර්ගවල ධාවනය කළ හැකි සාමාන්‍ය GT Dark Horse රථයක් නවසීලන්ත ඩොලර් 116,990 ක උපරිම මිලකට මිලදී ගත හැකිය.