නවසීලන්තයේ ඕක්ලන්ඩ් සත්වෝද්‍යානයේ (Auckland Zoo) වෙසෙන ගිරාෆ් රංචුවේ මව් නායිකාව (Matriarch) ලෙස හැඳින්වුණු, කාගේත් ආදරය දිනා සිටි ‘රූකියා’ (Rukiya) නම් වයෝවෘද්ධ ගිරාෆ් ධේනුව සත්වෝද්‍යාන බලධාරීන් විසින් සාමකාමීව මරණයට පත් කර (Euthanised) තිබේ. මියයන විට ඇය 25 වන වියේ පසු වූ අතර, එය ගිරාෆ් සත්වයෙකුගේ උපරිම ආයු කාල සීමාව වේ.
සත්වෝද්‍යාන පශු වෛද්‍ය සේවා කළමනාකාර ඩොක්ටර් ජේම්ස් චැටර්ටන් (Dr James Chatterton) ප්‍රකාශ කළේ, වයස්ගත වීමත් සමඟ රූකියා දැඩි ලෙස ඔස්ටියෝ ආතරයිටිස් (Osteoarthritis) රෝගයෙන් පීඩා විඳි බවයි. රෝගය නිසා ඇයගේ චලන හැකියාවන් සීමා වූ අතර, වේදනා නාශක ඖෂධ මඟින් ඇයට යම් සහනයක් ලබා දුන්නද, වයස්ගත රෝගී තත්ත්වයන් සම්පූර්ණයෙන්ම සුව කළ නොහැකි බැවින් ඇය තවදුරටත් වේදනා විඳීම වැළැක්වීම සඳහා මෙම මානුෂීය තීරණය ගත් බව වෛද්‍ය කණ්ඩායම සඳහන් කළේය.

2001 වසරේදී වෙලින්ටන් සත්වෝද්‍යානයේ උපත ලැබූ රූකියා, ඇයට වසරක් සපිරීමට මත්තෙන් ඕක්ලන්ඩ් සත්වෝද්‍යානය වෙත රැගෙන එන ලදී. එතැන් සිට වසර 24කට ආසන්න කාලයක් ඇය එහි ජීවත් වූවාය. ඇය සත්වෝද්‍යානයේ ගිරාෆ් බෝකිරීමේ සහ සංරක්ෂණ වැඩසටහන් සඳහා සුවිශේෂී දායකත්වයක් ලබා දුන් අතර, පැටවුන් පස්දෙනෙකු බිහිකළ මවක ද වේ. ඉන් පැටවුන් හතරදෙනෙකුම පසුව සත්වෝද්‍යානය තුළදීම පැටවුන් බිහිකිරීම නිසා ඇය සත්වෝද්‍යානයේ ගිරාෆ් පරම්පරාවල මිත්තණියක බවටද පත්ව සිටියාය.

වසර විසි ගණනක් තිස්සේ ඕක්ලන්ඩ් සත්වෝද්‍යානයට පැමිණි දහස් සංඛ්‍යාත නරඹන්නන්ගේ සහ සත්ව පාලකයන්ගේ නොමඳ ආදරය දිනාගත් රූකියාගේ සමුගැනීම, සත්වෝද්‍යාන කාර්ය මණ්ඩලයට මෙන්ම සමස්ත නවසීලන්ත වැසියන්ටම දැඩි ශෝකජනක පුවතක් වී තිබේ.