දහස් ගණනකට දැනුණු ප්‍රබල භූකම්පනය! නවසීලන්තයේ නැගෙනහිර වෙරළෙන් ආ හදිසි තොරතුරු!

නවසීලන්තයේ උතුරු ද්වීපයේ නැගෙනහිර වෙරළබඩ තීරයට ඔබ්බෙන් ප්‍රබල භූමිකම්පාවක් සිදුවී ඇති අතර, එයින් ඇති වූ දැඩි කම්පනය ප්‍රදේශ රැසක ජනතාව බියට පත් කිරීමට සමත් වී තිබේ. රික්ටර් මාපකයේ 5.7 ත් 5.9 ත් අතර ප්‍රබලතාවකින් සටහන් වූ මෙම භූකම්පනය Te Araroa ආසන්නයේ, කිලෝමීටර 10 ත් 40 ත් අතර ගැඹුරකින් රාත්‍රී 8:35 ට පමණ හටගෙන ඇත. මෙම කම්පනය Bay of Plenty, Tairāwhiti Gisborne, Hawke’s Bay ඇතුළු උතුරු ද්වීපයේ මධ්‍යම සහ පහළ ප්‍රදේශ රැසකට තදින්ම දැනී තිබේ.

කම්පනයත් සමඟ ගොඩනැගිලි සහ ජනේල ගැහීමට ලක්වූ අතර, දහස් සංඛ්‍යාත ජනතාවක් GeoNet වෙබ් අඩවිය වෙත තොරතුරු වාර්තා කරමින් කියා සිටියේ දැඩි පැද්දීමක් සහ කම්පනයක් අත්විඳි බවයි. ඉන් පසුවද ප්‍රබලතාවයෙන් අඩු පසුකම්පන කිහිපයක්ම වාර්තා විය. කෙසේ වෙතත්, මෙම භූමිකම්පාවෙන් සුනාමි අවදානමක් නොමැති බව හදිසි කළමනාකරණ බලධාරීන් තහවුරු කර ඇති අතර, මාර්ග, පාලම් සහ විදුලි බල පද්ධති පරීක්ෂා කිරීමෙන් පසු කිසිදු බරපතල හානියක් හෝ ජීවිත හානියක් වාර්තා වී නොමැති බව අනාවරණය කර ඇත.

පැසිෆික් සහ ඕස්ට්‍රේලියානු භූතල මායිමේ පිහිටා ඇති මෙම කලාපය නිතර භූකම්පනවලට ලක්වන ප්‍රදේශයක් වන අතර, මෙවැනි හදිසි තත්ත්වයකදී සුදානමින් සිටීමේ වැදගත්කම බලධාරීන් නැවතත් ජනතාවට මතක් කර දී තිබේ.