නවසීලන්තයේ වයිකාටෝ (Waikato) ප්‍රදේශයේ පදිංචි තරුණයෙකු මොළේඋණ (Meningococcal) නමැති බැක්ටීරියා ආසාදනයට ගොදුරු වී හදිසියේ මියයාමේ පුවතත් සමඟ සෞඛ්‍ය බලධාරීන් මහජනතාව වෙත දැඩි අනතුරු ඇඟවීමක් නිකුත් කර තිබේ. මෙම ඛේදනීය මරණයෙන් පසු ජාතික මහජන සෞඛ්‍ය සේවය (National Public Health Service) විසින් වහාම ක්‍රියාත්මක වී මියගිය තරුණයා සමඟ සමීපව ඇසුරු කළ පුද්ගලයින් හඳුනාගෙන ඔවුන්ට අවශ්‍ය පූර්වාරක්ෂිත ප්‍රතිකාර සහ සහාය ලබාදීමට පියවර ගෙන ඇත. අදාළ සිදුවීමෙන් මහජනතාවට තවදුරටත් සෘජු අවදානමක් නොමැති බව සෞඛ්‍ය බලධාරීන් තහවුරු කළද, මෙම රෝගයේ ඇති දරුණු බව සහ ක්ෂණිකව ජීවිතයට එල්ල වන තර්ජනය පිළිබඳව සැවොම අවධානයෙන් සිටිය යුතු බව අවධාරණය කරයි.

වයිකාටෝ ප්‍රදේශයේ සෞඛ්‍ය වෛද්‍ය නිලධාරිනී Dr Kate Meerkerk පෙන්වා දෙන්නේ මෙම රෝගය මොළය වටා ඇති පටල ආසාදනය වන මෙනින්ජයිටිස් (Meningitis) තත්ත්වය හෝ ලේ විෂවීම (Septicaemia) ඇති කළ හැකි අතිශය භයානක බැක්ටීරියා රෝගයක් බවයි. මෙම රෝගය සාමාන්‍යයෙන් දුර්ලභ වුවත්, එහි ප්‍රධානතම අන්තරාය වන්නේ ආසාදනය වී පැය කිහිපයක් වැනි කෙටි කාලයක් ඇතුළත රෝගියාගේ තත්ත්වය ඉතා සීඝ්‍රයෙන් බරපතළ වීමයි. කුඩා ළමුන්, යොවුන් වියේ පසුවන්නන් සහ තරුණයින් මෙම රෝගයට ගොදුරු වීමේ වැඩි ප්‍රවණතාවක් පවතින අතර, මුල් අවස්ථාවේදී සාමාන්‍ය උණ, සෙම්ප්‍රතිශ්‍යාව හෝ ඉන්ෆ්ලුවෙන්සා වැනි ලක්ෂණ පෙන්නුම් කළද ඉතා ඉක්මනින් දැඩි උණ, හිසකැක්කුම, බෙල්ල තදවීම, ආලෝකය දෙස බැලීමට නොහැකි වීම සහ අධික විඥානශූන්‍යතාව වැනි බරපතළ ලක්ෂණ මතුවිය හැක.

යම් හෙයකින් මෙවැනි රෝග ලක්ෂණ මතු වුවහොත් රෝගය ඉබේ හොඳ වන තෙක් නොසිට වහාම හදිසි වෛද්‍ය උපදෙස් ලබාගන්නා ලෙස නවසීලන්ත සෞඛ්‍ය අමාත්‍යාංශය (Health New Zealand) උපදෙස් දෙයි. එමෙන්ම මෙනින්ගොකොකල් බී (Meningococcal B) එන්නත ලබාගැනීම මගින් මේ සඳහා ඉහළ ආරක්ෂාවක් සැලසෙන අතර, වයස අවුරුදු පහට අඩු දරුවන්ට මෙන්ම නේවාසිකාගාර, හමුදා කඳවුරු සහ අධ්‍යාපන ආයතන වැනි ස්ථාන ආශ්‍රිතව වෙසෙන වයස අවුරුදු 13 සිට 25 දක්වා යෞවනයින්ට මෙම එන්නත නොමිලේ ලබාදීමේ වැඩසටහන් ක්‍රියාත්මක වේ. යම් හෙයකින් රෝගියෙකුගේ තත්ත්වය වේගයෙන් පිරිහෙන්නේ නම් ප්‍රමාද නොවී හදිසි ඇමතුම් සේවා (111) හෝ සෞඛ්‍ය උපදෙස් සේවාව (Healthline – 0800 611 116) ඇමතීමට බලධාරීන් ජනතාවට මතක් කර දෙයි.