අලුත් ලයිසන් එකෙන් කරදර වෙන්න පුළුවන්ද?

නවසීලන්තය 2026 වසර අවසාන වීමට පෙර ස්මාර්ට් ජංගම දුරකථන සඳහා ඩිජිටල් රියදුරු බලපත්‍ර (Digital Driver’s Licences) හඳුන්වා දීමට සූදානම් වීමත් සමඟ, රාජ්‍ය ආයතන හෝ හැකර්වරුන් (Hackers) මගින් ජනතාවගේ ගමන් බිමන් නිරීක්ෂණය කරනු ඇතැයි සමාජය තුළ දැඩි බියක් මතුව තිබේ. කෙසේ වෙතත්, මෙම පද්ධතියේ ඇති තාක්ෂණික ආරක්ෂණය සහ මෙරට පවතින පෞද්ගලිකත්ව ආරක්ෂණ නීති (Privacy Laws) හේතුවෙන් ජනතාව නිරීක්ෂණය කිරීමට (Tracking) හෝ දත්ත සොරකම් කිරීමට කිසිදු ඉඩක් නැති බව තාක්ෂණික විශේෂඥයෝ සහතික කරති.

නවසීලන්තයේ අභ්‍යන්තර කටයුතු දෙපාර්තමේන්තුව සමඟ සේවය කළ ඕස්ට්‍රේලියානු ඩිජිටල් අනන්‍යතා උපදේශක ක්‍රිස්ටෝෆර් ගෝ (Christopher Goh) පවසන්නේ, මෙම ඩිජිටල් බලපත්‍රවල දත්ත මධ්‍යගත සර්වර් (Central Cloud Servers) තුළ ගබඩා නොවී, අදාළ ස්මාර්ට් ජංගම දුරකථනයේම ආරක්ෂිත මතකයේ (Hardware Memory) සංකේතනය (Encrypted) වන බවයි.

එම නිසා පොලිස් නිලධාරීන් හෝ වෙනත් සේවකයන් බලපත්‍ර පරීක්ෂා කිරීමේදී අන්තර්ජාලය හරහා දත්ත හුවමාරුවක් සිදු නොවන අතර, තොරතුරු නිරීක්ෂණය කිරීමට රජයට හෝ වෙනත් පාර්ශ්වයකට තාක්ෂණික හැකියාවක් නැත. එසේම, ජංගම දුරකථනයෙන් බලපත්‍රයේ සක්‍රිය ඡායාරූප (Screenshots) ලබා ගැනීම වැළැක්වීමේ තාක්ෂණයද මීට ඇතුළත් කර ඇත. නවසීලන්තයේ පෞද්ගලිකත්ව පනත (Privacy Act) මගින් ද පුද්ගලයන් නිරීක්ෂණය කිරීම තහනම් කර ඇති අතර, මෙම ඩිජිටල් බලපත්‍රය ලබා ගැනීම අනිවාර්ය නොවන බැවින් කැමති අයට සාම්ප්‍රදායික ප්ලාස්ටික් කාඩ්පතම තවදුරටත් භාවිත කිරීමේ හැකියාවද පවතී.