ඡන්දය දෙන්නේ කාටදැයි තීරණය කරන්නේ කෘතිම බුද්ධියද? නවසීලන්තයෙන් අසන්නට ලැබෙන පෙරළිකාර පුවත!

නවසීලන්තයේ ඉදිරි මහ මැතිවරණයේදී තමන් ඡන්දය ප්‍රකාශ කළ යුත්තේ කවර පක්ෂයකටද යන්න තීරණය කිරීම සඳහා එරට ඡන්දදායකයින් විශාල පිරිසක් කෘතිම බුද්ධිය (AI) සහ Chatbot තාක්ෂණය භාවිත කිරීමට සූදානම් වන බව දේශපාලන විශ්ලේෂකයෝ සහ මතවිමසුම්කරුවෝ පෙන්වා දෙති. TVNZ නාලිකාවේ ‘Q+A’ වැඩසටහනට එක්වෙමින් Fresh Water Strategy ආයතනයේ අධ්‍යක්ෂ මයික් ටර්නර් (Mike Turner) ප්‍රකාශ කළේ, ප්‍රජාතන්ත්‍රවාදී මැතිවරණ ක්‍රියාවලිය තුළ කෘතිම බුද්ධි තාක්ෂණය දැවැන්ත තීරණාත්මක වෙනසක් සිදු කරමින් සිටින බවයි. අන්තර්ජාලය තුළ තොරතුරු අධික ලෙස පිරී පැවතීම නිසා ජනතාවට නිවැරදි තොරතුරු තෝරාගැනීම අපහසු වී ඇති අතර, මෙම මැතිවරණය ඡන්දදායකයින් තීරණ ගැනීමට AI තාක්ෂණය උපයෝගී කරගන්නා පළමු ප්‍රධාන මැතිවරණය බවට පත්වන බවද ඔහු සඳහන් කළේය.

සමාජ මාධ්‍ය හරහා තොරතුරු ගලා ඒම වැඩිවීමත් සමග සාම්ප්‍රදායික දේශපාලන ප්‍රචාරක ව්‍යාපාර කෙරෙහි ජනතාවගේ අවධානය අඩුවී ඇති අතර, බොහෝ පිරිස් ඡන්දය ප්‍රකාශ කිරීමට ආසන්න වන තෙක්ම කිසිදු පක්ෂයකට සෘජු සහයෝගය පළ නොකිරීමට වගබලා ගනිති. ඒ වෙනුවට ඡන්දය දීමට ප්‍රථමයෙන් අන්තර්ජාලය ඔස්සේ AI උපදෙස් ලබාගෙන ඉක්මන් තීරණ ගැනීමට වැඩිහිටි මෙන්ම තරුණ ඡන්දදායකයින් පෙළඹී ඇත. විශේෂයෙන්ම තරුණ පරම්පරාවේ ඡන්දදායකයින් දේශීය දේශපාලනයට වඩා විදේශීය දේශපාලන තොරතුරු සහ ඇල්ගොරිතම (Algorithms) මගින් සපයන දත්ත කෙරෙහි වැඩි විශ්වාසයක් තැබීම නිසා දේශපාලන පක්ෂවලට තම ඡන්ද පදනම රැකගැනීම විශාල අභියෝගයක් වී තිබේ.

මේ වන විටත් ප්‍රචාරක කටයුතු සඳහා AI ඔස්සේ ස්වයංක්‍රීය දුරකථන ඇමතුම් ලබාදීම වැනි නවීන තාක්ෂණික ක්‍රම භාවිත කිරීමට දේශපාලන පක්ෂ පියවර ගෙන තිබුණද, ඡන්දදායකයින් වෙත කෙළින්ම තම පණිවිඩය යැවීමට තිබූ හැකියාව දේශපාලඥයන්ට අහිමි වෙමින් පවතී. සාම්ප්‍රදායික මාධ්‍යවලින් බැහැරව AI තාක්ෂණය මගින් සකස් කර දෙන තොරතුරු කෙරෙහි ජනතාව තබන මෙම විශ්වාසය හමුවේ, ඉදිරි මැතිවරණයේ ප්‍රතිඵලය තීරණය කිරීමේ ප්‍රධාන බලවේගයක් බවට කෘතිම බුද්ධිය පත්වනු ඇති බව විශ්ලේෂකයින්ගේ මතයයි.