කතිර සලකුණ වෙනත් තැනකට යයි! ඇඩෝබි මෘදුකාංගය නිසා නවසීලන්ත ඡන්ද පත්‍රිකාවල හටගත් අමුතු දෝෂය!

විදේශගත ඡන්දදායකයන්ගේ විද්‍යුත් ඡන්ද පත්‍රිකාවල පක්ෂ ලකුණු කිරීමේදී පැනනැඟී ඇති තාක්ෂණික දෝෂයක් හේතුවෙන් නවසීලන්ත මැතිවරණ ක්‍රියාවලිය කෙරෙහි ජාත්‍යන්තර අවධානය යොමු වී තිබේ. විදේශයන්හි සිටින නවසීලන්ත වැසියන් අඩෝබි Adobe මෘදුකාංගය ඔස්සේ සිය ඡන්ද පත්‍රිකා පුරවන විට, ඇතැම් දේශපාලන පක්ෂ තේරීමට නොහැකි වන පරිදි මෙම බාධාව මතුව ඇත.

අන්තර්ජාලය ඔස්සේ ඡන්ද පත්‍රිකා සපයන මෙම පද්ධතිය තුළ, පාවිච්චි කරන මෘදුකාංගය සහ උපාංගය අනුව විවිධ වෙනස්කම් දක්නට ලැබෙන බව ඡන්දදායකයෝ පවසති. එක් ඡන්දදායකයෙකු සඳහන් කර තිබුණේ කාන්තා අයිතිවාසිකම් පක්ෂය හැර අනෙක් සියලුම පක්ෂ ඉදිරියේ නිල් පැහැති සලකුණක් යෙදිය හැකි බවයි. තවත් අයෙකුට නැෂනල් පක්ෂයේ (National Party) කොටුව සුදු පැහැයෙන් ද ලේබර් පක්ෂයේ (Labour Party) කොටුව නිල් පැහැයෙන් ද දර්ශනය වී තිබේ. එසේම, ග්‍රීන් පක්ෂයේ (Green Party) සලකුණ තිබිය යුතු ස්ථානයෙන් තරමක් ඉවතට පැමිණ තිබීම නිසා, සාමාන්‍ය පරිදි නිවැරදි ස්ථානයේ කතර සලකුණ යෙදීමට නොහැකි වූ බව තවත් අයෙකු පෙන්වා දී තිබුණි. නිල ඡන්ද පත්‍රිකාවක සියලුම පක්ෂ සඳහා සමාන ලෙස ඡන්දය ප්‍රකාශ කිරීමට තිබිය යුතු අයිතිය මෙයින් පැහැර ගැනෙන බවට විදේශගත ඡන්දදායකයෝ මැසිවිලි නඟති.

මෙම තාක්ෂණික දෝෂය පිළිබඳව අවධානය යොමු කර ඇති නවසීලන්ත මැතිවරණ කොමිෂන් සභාව (Electoral Commission) ප්‍රකාශ කරන්නේ, ඡන්දදායකයාගේ කැමැත්ත පැහැදිලිව සටහන් වී ඇත්නම් එවැනි කුඩා ආකෘතිමය දෝෂ හේතුවෙන් ඡන්දයක් අවලංගු නොවන බවයි.

කෙසේ වෙතත්, තමන් තේරූ පක්ෂය නිවැරදිව සටහන් වී ඇත්දැයි පද්ධතියට උඩුගත කිරීමට (upload) පෙර හොඳින් පරීක්ෂා කර බලන ලෙස මැතිවරණ බලධාරීන් විදේශගත ඡන්දදායකයන්ගෙන් ඉල්ලා සිටී. ජාත්‍යන්තර තැපැල් ප්‍රමාදයන්ගෙන් තොරව ජාතික මැතිවරණයකට දායක වීමට ඇති මෙම විද්‍යුත් ක්‍රමය තුළ මතුවූ මෙවැනි තාක්ෂණික ගැටලු, ඩිජිටල් ප්‍රජාතන්ත්‍රවාදයේ ඇති සූක්ෂ්ම අවදානම් මනාව පැහැදිලි කරයි.