ජර්මනියේ ප්‍රසිද්ධ Nürburgring ධාවන පථයේ පැවති endurance (දිගු දුර) මෝටර් රථ තරඟයකදී සිදු වූ දැඩි අනතුරකින් රියදුරෙකු මියගොස් තිබේ. මෙම තරඟය, සුප්‍රසිද්ධ F1 ධාවක Max Verstappen සහභාගී වීමට නියමිතව තිබූ තරඟ මාලාවක කොටසක් ලෙස පැවැත්වෙමින් තිබුණි.
අදාළ අනතුර 2026 අප්‍රේල් 18 දින පැවති ADAC පැය 24 Nürburgring Qualifiers තරඟයේ ආරම්භක අදියරේදී සිදුවී ඇති අතර, වාහන 7ක් එකිනෙක ගැටීමෙන් මෙම බිහිසුණු තත්ත්වය ඇතිව තිබේ. මියගිය රියදුරා වයස අවුරුදු 66ක් වූ Juha Miettinen බව තහවුරු කර ඇත.
තරඟ සංවිධායකයින් සඳහන් කරන්නේ, අනතුර සිදුවීමත් සමඟම තරඟය වහාම නවතා දැමූ බවයි. හදිසි ආරක්ෂක සේවා කණ්ඩායම් ඉක්මනින් පැමිණ රියදුරාව වාහනයෙන් ඉවත් කර වෛද්‍ය මධ්‍යස්ථානයට රැගෙන ගොස් ඇතත්, ඔහුගේ ජීවිතය බේරා ගැනීමට නොහැකි විය.
මෙම අනතුරට සම්බන්ධ වූ අනෙකුත් රියදුරන් 6 දෙනා වෛද්‍ය පරීක්ෂාව සඳහා රෝහල් වෙත යොමු කර ඇති අතර, ඔවුන් කිසිවෙකුත් ජීවිත අවදානමක නොසිටි බව නිලධාරීන් සඳහන් කරයි.
මෙම සිද්ධිය හේතුවෙන් තරඟය එදිනට සම්පූර්ණයෙන්ම අවලංගු කර ඇති අතර, මියගිය රියදුරාට ගෞරවයක් වශයෙන් ඉදිරි තරඟයට පෙර මිනිත්තු එකක නිශ්ශබ්දතාවයක් පවත්වා ගැනීමටද තීරණය කර ඇත.
තරඟය පිළිබඳ අවධානය වැඩි වී තිබුණේ, Max Verstappen මෙම endurance තරඟයට සූදානම් වෙමින් සිටීම හේතුවෙනි. ඔහු මෙම අනතුරට සෘජුව සම්බන්ධ වී නොතිබූ බව වාර්තා වේ.
නර්බර්ග්රින්ග් ධාවන පථය ඉතා අභියෝගාත්මක සහ අවදානම්කාරී ලෙස ලොව පුරා ප්‍රසිද්ධ වන අතර, මෙවැනි අනතුරු මෝටර් රථ ක්‍රීඩාවේ පවතින අවදානම යළි සිහිපත් කරයි.
0 Comments