නවසීලන්ත බන්ධනාගාර දෙපාර්තමේන්තුවේ සේවය කරන Transgender ආරක්ෂක නිලධාරියෙකුට පිරිමි සිරකරුවන් සෝදිසි කිරීමේ රාජකාරි තහනම් කිරීමට එරෙහිව පැන නැඟුණු නීතිමය ආරවුල අවසානයේ එම නිලධාරියාට පක්ෂව විසඳී ඇත. ඒ වෙනුවෙන් බන්ධනාගාර දෙපාර්තමේන්තුව විසින් අදාළ නිලධාරියාගෙන් නිල වශයෙන් සමාව අයැද ඇති අතර මූල්‍යමය වන්දි ගෙවීමට ද පියවර ගෙන තිබේ.
තමන් කාන්තාවකගෙන් පුරුෂයෙකු ලෙස සංක්‍රාන්ති ලිංගිකත්වයට පත්ව, නීත්‍යානුකූලව සහ සමාජීය වශයෙන් පිරිමියෙකු ලෙස පිළිගෙන තිබියදීත්, පිරිමි සිරකරුවන් සෝදිසි කිරීමේ සාමාන්‍ය රාජකාරිවලින් තමන්ව ඉවත් කිරීමට බන්ධනාගාර බලධාරීන් කටයුතු කළ බව පවසමින් මෙම නිලධාරියා මානව හිමිකම් සහ සේවා නියුක්ති අයිතිවාසිකම් උල්ලංඝනය වීමේ පදනම මත නඩු පවරා තිබුණි.
සාමාන්‍යයෙන් බන්ධනාගාර නීති රීති අනුව සිරකරුවන්ගේ පෞද්ගලිකත්වය ආරක්ෂා කිරීම සඳහා සෝදිසි කිරීම් සිදු කරනු ලබන්නේ එම ලිංගයටම අයත් නිලධාරීන් විසිනි. කෙසේ වෙතත්, තම අනන්‍යතාවය නොසලකා හරිමින් මෙම රාජකාරිය තහනම් කිරීම මගින් තමන් දැඩි වෘත්තීයමය පසුබෑමකට, මානසික පීඩාවකට සහ වෙනස්කොට සැලකීමකට ලක්වූ බව එම නිලධාරියා පෙන්වා දුන්නේය.
මෙම නීතිමය ප්‍රශ්නය සමථයකට එළඹීමත් සමග, බන්ධනාගාර දෙපාර්තමේන්තුව පිළිගෙන ඇත්තේ තම ආයතනය අදාළ නිලධාරියාගේ අයිතිවාසිකම් නිසි ලෙස ආරක්ෂා කිරීමට අපොහොසත් වූ බවයි. මෙම නඩු තීන්දුව නවසීලන්තයේ රාජ්‍ය සහ පෞද්ගලික අංශවල සේවය කරන සංක්‍රාන්ති ලිංගික ප්‍රජාවගේ වෘත්තීය අයිතිවාසිකම් තහවුරු කෙරෙන ඓතිහාසික සන්ධිස්ථානයක් ලෙස සැලකේ.
0 Comments