නවසීලන්ත වැසියන්ගේ රැකියා අහිමි කරමින්වූල්වර්ත්ස් සමාගම ගත් ආන්දෝලනාත්මක තීරණය!

නියමිත සාකච්ඡා වට කිහිපයකින් පසුව, තම ආයතනයේ නවසීලන්ත පාරිභෝගික සේවා අංශය ඕස්ට්‍රේලියාවේ සිඩ්නි නුවර වෙත ගෙන යාමට ‘වූල්වර්ත්ස්’ (Woolworths) සුපිරි වෙළඳසැල් ජාලය තීරණය කර තිබේ. මෙම පියවර හේතුවෙන් වසර ගණනාවක් තිස්සේ දේශීය පාරිභෝගිකයන් වෙනුවෙන් සේවය කළ නවසීලන්ත වැසියන් 130 කට ආසන්න පිරිසකට සිය රැකියා අහිමි වීමේ අවදානමක් මතුව ඇත. ආයතනයේ අනවශ්‍ය වියදම් අවම කරගනිමින්, මෙහෙයුම් කටයුතු සරල කිරීම සහ ව්‍යාපාරයේ දිගුකාලීන පැවැත්ම තහවුරු කිරීම මෙම තීරණයට හේතු වූ බව ආයතනික පාලනාධිකාරිය සඳහන් කරයි.

මෙම අසීරු තීරණය සම්බන්ධයෙන් අදහස් දැක්වූ වූල්වර්ත්ස් නවසීලන්ත ඩිජිටල් සහ විද්‍යුත් වාණිජ අධ්‍යක්ෂ මාර්ක් වුල්ෆෙන්ඩන් (Mark Wolfenden) කියා සිටියේ, බලපෑමට ලක්වන සේවකයන් වෙනුවෙන් තම ආයතනයේ සුපිරි වෙළඳසැල් ජාලය සහ සැපයුම් දාමය තුළ විකල්ප රැකියා අවස්ථා ලබා දීමට ප්‍රමුඛතාව ලබා දෙන බවයි. කෙසේ වෙතත්, 2026 ජූනි මාසයෙන් අවසන් වූ මූල්‍ය වසරේදී වූල්වර්ත්ස් සමාගම නවසීලන්ත ඩොලර් මිලියන 163 ක බදු සහ පොලී ගෙවීමට පෙර ලාභයක් (EBIT) ලබා තිබියදී මෙලෙස රැකියා කපා හැරීමට තීරණය කිරීම ‘වර්කර්ස් ෆර්ස්ට්’ (Workers First) වෘත්තීය සමිතියේ දැඩි දෝෂදර්ශනයට ලක්ව ඇත.

එම වෘත්තීය සමිතියේ නියෝජ්‍ය ලේකම් රඩ් හිවුස් (Rudd Hughes) චෝදනා කරන්නේ, නවසීලන්ත පාරිභෝගිකයන්ගෙන් විශාල ලෙස ලාභ ලබන සමාගමක් සුළු මුදලක් ඉතිරි කරගැනීම සඳහා මෙලෙස දේශීය ජනතාවගේ රැකියා අහිමි කිරීම කණගාටුදායක බවයි. මෙම තත්ත්වය හමුවේ අදාළ සේවකයන්ට හිමිවිය යුතු වන්දි මුදල් සහ විකල්ප රැකියා අවස්ථා නිසි ලෙස ලබා දීමට මැදිහත්වන බව ද වෘත්තීය සමිතිය වැඩිදුරටත් අවධාරණය කරයි.