නවසීලන්තයේ ක්වීන්ස්ටවුන් (Queenstown) ආශ්‍රිත වෝල්ටර් පීක් (Walter Peak) ප්‍රදේශයේ දින තුනක් පුරා සීඝ්‍රයෙන් පැතිර ගිය දැවැන්ත ලැව්ගින්න සම්පූර්ණයෙන් පාලනය කිරීමට ගිනි නිවන භටයින් සමත් වී තිබේ. වෝල්ටර් පීක්, සීසිල් පීක් (Cecil Peak) සහ රක්ෂිත වනාන්තර භූමි ඇතුළත්ව හෙක්ටයාර 1,350ක පමණ භූමි ප්‍රමාණයක් විනාශ කළ මෙම මහා ගින්න, බ්‍රහස්පතින්දා සවස වන විට පාලනය කළ බව නවසීලන්ත ගිනි හා හදිසි අවස්ථා ඒකකය (Fire and Emergency NZ) තහවුරු කළේය.
පසුගිය අඟහරුවාදා පස්වරුවේ වෝල්ටර් පීක් ගොවිපළ ආසන්නයෙන් ආරම්භ වූ මෙම ගින්න, වියළි තණකොළ හා පඳුරු ඔස්සේ වේගයෙන් ව්‍යාප්ත විය. දුෂ්කර කඳුකර භූමි ලක්ෂණ හේතුවෙන් ගින්න පාලනය කිරීම දැඩි අභියෝගයක් වූ අතර, බදාදා වන විට එය හෙක්ටයාර 1,400ක් දක්වා පැතිර ගොස් තිබුණි. කෙසේ වෙතත්, හෙලිකොප්ටර් යානා පහක් සහ ගිනි නිවන භටයින් පිරිසක් එක්ව සිදුකළ මෙහෙයුම් මගින් ඓතිහාසික ගොවිපළ නිවාස ඇතුළු ප්‍රධාන ගොඩනැගිලි ආරක්ෂා කර ගැනීමට හැකි වූ බව දිස්ත්‍රික් කමාණ්ඩර් බ්ලෙයාර් කීලි (Blair Kiely) පැවසීය.
බ්‍රහස්පතින්දා රාත්‍රියේ ප්‍රදේශයට ඇද හැලුණු වැස්ස සහ පහළ ගිය උෂ්ණත්වය ගිනි නිවීමේ මෙහෙයුම්වලට මහත් රුකුලක් විය. ගින්න පාලනය කිරීමෙන් අනතුරුව ගිනි නිවන භටයින් එම ස්ථානයෙන් ඉවත් වී ඇති අතර, භූමියේ ඉදිරි කළමනාකරණ කටයුතු ඉඩම් හිමියන්ට පවරා ඇත. එසේම, හෙලිකොප්ටර් මගින් ජලය ලබා ගැනීම සඳහා වෝල්ටර් පීක් වෙරළාසන්න වැවෙහි පනවා තිබූ නෞකා තහනම ද මේ වන විට ඉවත් කර තිබේ.
ගින්න සම්පූර්ණයෙන් නිවී ගොස් නොමැති අතර, ඇතැම් ස්ථානවලින් තවදුරටත් දුමාරය නැගිය හැකි බවට බලධාරීන් ප්‍රදේශවාසීන්ට අනතුරු අඟවයි. එම නිසා නිවාසවල ජනේල වසා තබන ලෙසත්, වායු සමීකරණ යන්ත්‍ර (Air conditioners) භාවිතයෙන් වළකින ලෙසත් උපදෙස් දී ඇත. ලබන සඳුදා ගුවන් මගින් නැවත පරීක්ෂාවක් සිදු කිරීමට නියමිත අතර, යම් හෙයකින් නැවත ගින්න පැතිරීමේ අවදානමක් මතුවුවහොත් වහාම ක්‍රියාත්මක වීමට හදිසි සේවා සූදානමින් සිටී.
සෙප්තැම්බර් 30 වැනිදා මෙම ගොවිපළේ සිදුකළ පාලිත ගිනි තැබීමක් (Controlled burn) නැවත ඇවිළී යාමෙන් මෙම අනතුර සිදු වූයේද යන්න පිළිබඳව ජ්‍යෙෂ්ඨ පරීක්ෂකවරයෙකුගේ මූලිකත්වයෙන් පූර්ණ පරීක්ෂණයක් ආරම්භ කර ඇත.
0 Comments