රිය අනතුරුවලින් සිදු වූ මරණ සංඛ්‍යාවෙන් තුනෙන් දෙකකට ආසන්න ප්‍රමාණයකට වගකියමින් සහ දියේ ගිලීම්වලින් සිදු වූ මරණ මෙන් දෙගුණයකටත් වඩා වැඩි අගයක් සටහන් කරමින්, පසුගිය වසරේදී නවසීලන්තය තුළ පුද්ගලයන් 169 දෙනෙකු නොසිතූ ලෙස ඖෂධ සහ මත්ද්‍රව්‍ය අධිමාත්‍රාවීමෙන් (accidental overdoses) ජීවිතක්ෂයට පත්ව ඇති බව නවසීලන්ත මත්ද්‍රව්‍ය පදනම (NZ Drug Foundation) නිකුත් කළ නවතම වාර්තාවක් හෙළිදරව් කරයි. මින් අඩකට ආසන්න ප්‍රමාණයක් තවමත් තාවකාලික දත්ත ලෙස පවතින නමුත්, මෙලෙස මරණ සංඛ්‍යාව ඉහළ යාමට ප්‍රධානතම හේතුව වී ඇත්තේ 2022 වසරේ සිට රට තුළ මෙතම්ෆෙටමීන් (methamphetamine) සහ කොකේන් (cocaine) වැනි උත්තේජක මත්ද්‍රව්‍ය භාවිතය ශීඝ්‍රයෙන් ඉහළ යාම බවත්, ඒ හේතුවෙන් රෝහල්ගත කිරීම් සහ මරණ වැඩි වී ඇති බවත් පදනමේ විධායක අධ්‍යක්ෂිකා සාරා හෙල්ම් (Sarah Helm) පෙන්වා දෙන්නීය.
විශේෂයෙන්ම වයස අවුරුදු 45ත් 54ත් අතර පුද්ගලයන් මෙම අධිමාත්‍රා මරණවලට වැඩි වශයෙන් ගොදුරු වන අතර, සාමාන්‍ය වැසියන්ට වඩා දෙගුණයක අනුපාතයකින් මවුරි (Māori) දේශීය ජනතාව අධිමාත්‍රාවීමෙන් මියයාමේ සහ විෂවීම් නිසා රෝහල්ගත වීමේ අවදානමකට මුහුණ දී සිටින බව වෛද්‍ය සහ මත්ද්‍රව්‍ය ඇබ්බැහිවීම් පිළිබඳ විශේෂඥ විකී මැක්ෆාර්ලේන් (Dr. Vicki Macfarlane) සඳහන් කරයි. වැඩිහිටි පිරිස් අධික ලෙස උත්තේජක භාවිත කිරීමේදී ඇතිවන බරපතල හෘදයාබාධ අවදානම පිළිබඳව සමාජය දැනුවත් කිරීමේ හදිසි අවශ්‍යතාවක් පවතින බවද ඇය අවධාරණය කළාය.
මේ අතර, නේපියර් හිදී අවාසනාවන්ත ලෙස ජීවිතයෙන් සමුගත් 32 හැවිරිදි ස්ටුවර්ට් ප්ලෙජර්-ඩේවිස් (Stewart Pledger-Davies) ගේ මව වන ජොආනා නියුටන් (Joanna Newton) සඳහන් කරන්නේ, මත්ද්‍රව්‍ය භාවිත කරන අනෙකුත් පිරිස් නීතිමය ගැටලුවලට බියෙන් හදිසි අවස්ථාවලදී වෛද්‍ය ආධාර ලබා ගැනීමට මැලිවීම නිසා බොහෝ ජීවිත අහිමි වන බවයි. මෙම තත්ත්වය වෙනස් කිරීම සඳහා හදිසි අවස්ථාවකදී උදව් ඉල්ලන පුද්ගලයන්ට නීතිමය මුක්තිය ලබාදෙන Good Samaritan bill ලෙස හැඳින්වෙන නව කෙටුම්පතක් දැනට සෞඛ්‍ය කාරක සභාව හමුවේ පවතින අතර, මත්ද්‍රව්‍ය පදනම සහ විපතට පත් පවුල් රජයෙන් ඉල්ලා සිටින්නේ මෙම නීතිමය සංශෝධන වහා ක්‍රියාත්මක කරන ලෙසයි. මීට අමතරව, ඕස්ට්‍රේලියාවේ මෙන් අධිමාත්‍රාවූ විට භාවිත කරන naloxone ඖෂධය නිවසටම ලබාදීමේ වැඩපිළිවෙළක් සහ විශේෂිත සෞඛ්‍ය උපකාරක වැඩසටහන් ආරම්භ කරන ලෙසද ඔවුහු බලධාරීන්ගෙන් ඉල්ලා සිටිති.
0 Comments