නවසීලන්තයේ උතුරු දූපත (North Island) හරහා හමාගිය චණ්ඩ මාරුත තත්ත්වයක් හේතුවෙන් අකුණු සැර 4,800කට අධික ප්‍රමාණයක් වාර්තා වෙමින් ඊයේ දින (07) දහවල් කාලයේදීම ප්‍රදේශය පුරා අඳුරු වාතාවරණයක් ගොඩනැඟී තිබුණි. පැයකට මිලිමීටර් 40ක් දක්වා වූ තද වැසි ඇදහැලීමේ අවදානමක් පවතින බවට කාලගුණ විද්‍යාඥයින් අනතුරු අඟවා ඇති අතර, මෙම දැඩි වර්ෂාපතනයත් සමඟ පහත්බිම්, නාගරික මාර්ග සහ ජලාපවහන පද්ධති අවහිර වූ ප්‍රදේශවල හදිසි ගංවතුර තත්වයක් ඇතිවීමේ දැඩි අවදානමක් මතුව ඇත. නිරන්තරයෙන් ඇසුණු අකුණු ගර්ජනා හමුවේ බලධාරීන් සහ හදිසි කළමනාකරණ කණ්ඩායම් ජනතාවට දැඩි අවධානයෙන් පසුවන ලෙස දැනුම් දී තිබුණි.
මෙම අයහපත් කාලගුණය හේතුවෙන් ගමනාගමන කටයුතුවලට සහ එළිමහන් ක්‍රියාකාරකම්වලට බාධා එල්ල වී ඇති අතර, පෙනීමට බාධා සහ මාර්ගවල ජලය පිරීම නිසා රියපැදවීමේදී පරීක්ෂාකාරී වන ලෙස උපදෙස් දී තිබේ. කුණාටු සහිත තත්ත්වය ක්‍රමයෙන් වෙනත් ප්‍රදේශ වෙත ඇදී යද්දී, බලධාරීන් ප්‍රාදේශීය ජල මාර්ගවල ජල මට්ටම පිළිබඳව දැඩි අවධානයෙන් පසුවෙයි. ප්‍රදේශවාසීන්ට නිල කාලගුණ වාර්තා කෙරෙහි අවධානය යොමු කරන ලෙසත්, පවතින අවදානම්කාරී තත්ත්වයන් හමුවේ ආරක්ෂිත පියවර ගන්නා ලෙසත් දැනුම් දී ඇත.
0 Comments