උතුරු දූපතට වැසි හා සුළං අඩුවෙයි! කුණාටුව නවසීලන්තයෙන් ඉවතට ගමන් කරයි.

🔻අවදානම් නිවේදන ඉවත් වෙමින් තිබුනත් තවමත් ප්‍රදේශ කිහිපයකට සුළු අවදානමක් පවතියි.

නවසීලන්තයේ උතුරු දූපතට බලපාමින් පැවති භයානක කුණාටු තත්ත්වය දැන් අඩුවෙමින් පවතින බව වාර්තා වෙයි. “වයිආනු” නම් උෂ්ණ කලාපීය සයික්ලෝනය දිවයිනෙන් ඉවතට ගමන් කිරීමත් සමඟ, පසුගිය සිකුරාදා සිට ක්‍රියාත්මකව තිබූ රතු සහ කහ-තැඹිලි (orange) අනතුරු ඇඟවීම් බොහෝමයක් දැන් ඉවත් කර ඇත.

කෙසේ වෙතත්, හොක්ස් බේ (Hawke’s Bay) සහ ටරරුවා (Tararua) ප්‍රදේශවලට අද රාත්‍රී කාලයේදී තවමත් තැඹිලි සුළං අනතුරු ඇඟවීම් පවතින අතර, බේ ඔෆ් ප්ලෙන්ටි (Bay of Plenty), රොටොරුවා (Rotorua) සහ ටයිරාවිටි (Tairāwhiti) ප්‍රදේශවල සුළං අනතුරු තත්ත්වය දැන් “කහ අවධානය” (yellow watch) මට්ටමට පහළ දමා ඇත.

MetService කාලගුණ විද්‍යාඥ John Law ප්‍රකාශ කරන්නේ, කුණාටුවේ කේන්ද්‍රය දැන් නවසීලන්තයේ නැගෙනහිර වෙරළෙන් ඉවතට, හොක්ස් බේ ප්‍රදේශය අසලට ගමන් කරමින් ඇති බවයි. එමෙන්ම සුළං දිශාවද දැන් දකුණු-බටහිර දෙසට හැරී ඇති බව ඔහු පැවසීය.

තවද, ටාව්පෝ වැවට (Lake Taupō) නැගෙනහිර පැතිවල තවමත් වැසි තත්ත්වයක් පවතින නමුත්, ඉදිරි පැය කිහිපය තුළ එයද ඉවතට ගමන් කරමින් කාලගුණය සාමාන්‍ය තත්ත්වයට පත්වීමට නියමිතය.

👉 සමස්තයක් වශයෙන්, තද කුණාටු තත්ත්වය දැන් පහව යමින් පවතින අතර, ඉදිරි කාලය තුළ කාලගුණය සන්සුන් වීමක් අපේක්ෂා කළ හැක.