නිවසක නාන කාමරයක සිටින මකුළුවෙකු හෝ වෙනත් කුඩා කෘමියෙකු දැකීම සාමාන්ය දෙයකි. නමුත් නවසීලන්තයේ Auckland නුවර පදිංචිකරුවෙකුට තම නාන කාමරයේදී මුහුණ දීමට සිදු වූයේ මුළු රටේම දේශසීමා ආරක්ෂක අංශ පවා කලඹන සුළු අත්දැකීමකටය. ඒ, ඔහුගේ නාන කාමර බිම දිගේ ඇවිද යමින් සිටි සත්වයා සාමාන්ය මකුළුවෙකු නොව, විෂ සහිත සජීවී ගෝනුස්සෙකු (Scorpion) බව තහවුරු වීමත් සමඟය.
නවසීලන්ත ජෛව ආරක්ෂණ ආයතනය (Biosecurity New Zealand) විසින් මෙම සත්වයා සැබෑ ගෝනුස්සෙකු බව නිල වශයෙන් තහවුරු කර ඇති අතර, නවසීලන්තය වැනි දැඩි දේශසීමා නීති ඇති රටකට මෙම විෂ සහිත සත්වයා ඇතුළු වූයේ කෙසේද යන්න පිළිබඳව ඔවුන් වහාම පුළුල් විමර්ශනයක් ආරම්භ කර ඇත.
නවසීලන්තය තුළ ස්වදේශික ගෝනුස්සන් විශේෂ කිසිවෙකුත් ජීවත් නොවන බැවින්, මෙවැනි සජීවී සත්වයෙකු රට තුළින් හමුවීම ඉතා බරපතළ ආරක්ෂක දෝෂයක් ලෙස සැලකේ. මෙම සත්වයා දින ගණනාවක් ආහාර හෝ ජලය නොමැතිව ජීවත් විය හැකි බැවින්, ජාත්යන්තර නැව් බහාලුම් (Cargo), විදේශීය භාණ්ඩ හෝ සංචාරකයන්ගේ ගමන් මලු තුළ සැඟවී රට තුළට පැමිණෙන්නට ඇතැයි සැක කෙරේ. මේ හේතුවෙන් එම නිවසේ වැසියන් මෑතකදී විදේශගත වූවාද නැතහොත් අන්තර්ජාලය හරහා විදේශීය භාණ්ඩ ඇණවුම් කළාද යන්න පිළිබඳව ප්රශ්න කෙරෙමින් පවතී.
බලධාරීන් පවසන්නේ මෙම ගෝනුස්සා අධික ලෙස මාරාන්තික විෂ සහිත වර්ගයකට අයත් නොවන බැවින් ජනතාව කලබල විය යුතු නැති නමුත්, රටේ සංවේදී පරිසර පද්ධතියට මෙවැනි සතුන්ගෙන් දැඩි තර්ජනයක් එල්ල විය හැකි බවයි. සත්වයා මැරීමට හෝ පැන යාමට ඉඩ නොදී, ඉතා බුද්ධිමත් ලෙස භාජනයකට දමා සුරක්ෂිත කිරීමට කටයුතු කළ ඕක්ලන්ඩ් වැසියාට ආරක්ෂක අංශ පැසසුම් කර සිටියි. එමෙන්ම මෙවැනි අසාමාන්ය විදේශීය සතුන් දැකගතහොත් වහාම 0800 80 99 66 යන ක්ෂණික ඇමතුම් අංකයට දැනුම් දෙන ලෙසද මහජනතාවගෙන් ඉල්ලා සිටී.
0 Comments