නවසීලන්ත මන්ත්‍රීවරුන්ට වැදුණු තහනම නිසා පැසිෆික් කලාපය උණුසුම් වෙයි!

තායිවානයේ සංචාරයක නිරත වූ නවසීලන්ත පාර්ලිමේන්තු මන්ත්‍රීවරුන් සිව්දෙනෙකුට පැනවූ සංචාරක තහනමක් හේතුවෙන් නවසීලන්තය සහ චීනය අතර දැඩි රාජ්‍යතාන්ත්‍රික උණුසුමක් හටගෙන තිබේ. මෙම සිදුවීමට ඔස්ට්‍රේලියාව ද මැදිහත් වී තම කනගාටුව ප්‍රකාශ කර ඇති අතර, නවසීලන්ත අග්‍රාමාත්‍ය Christopher Luxon මහතා අවධාරණය කරන්නේ මෙය ඔස්ට්‍රේලියාවට අදාළ නොවන, නවසීලන්තය සහ චීනය අතර සෘජුව විසඳාගත යුතු “දේශපාලන මට්ටමේ” ගැටලුවක් බවයි.

🔴 තහනමට හේතු වූ තායිවාන සංචාරය.

2026 මැයි මාසයේදී නවසීලන්තයේ පාලක සහ විපක්ෂ කණ්ඩායම් නියෝජනය කරමින් මන්ත්‍රීවරුන් සිව්දෙනෙකු දින පහක තායිවාන සංචාරයක නිරත විය. මොවුන් නැවත පැමිණීමෙන් පසු, චීන තානාපති කාර්යාලය විසින් ඔවුන්ට ප්‍රධාන චීන භූමිය, හොංකොං සහ මැකාවු රාජ්‍යයන් වෙත ඇතුළුවීම වසරකට තහනම් කර ඇති බව දැනුම් දී ඇත. එමෙන්ම, මේ පිළිබඳව සමාව ගතහොත් තහනම ඉවත් කරන බව චීනය දන්වා සිටියද, මන්ත්‍රීවරුන් එය එකහෙළා ප්‍රතික්ෂේප කර තිබේ.
ඔස්ට්‍රේලියානු අගමැති Anthony Albanese හමුවීමට බ්‍රිස්බේන් නුවරට පැමිණි අවස්ථාවේදී අගමැති ලක්සන් මාධ්‍ය වෙත මෙසේ පැවසීය:

“චීනයේ මෙම ක්‍රියාකලාපය කිසිසේත්ම සුදුසු නැහැ. අපේ මන්ත්‍රීවරුන්ට තමන් කැමති අය හමුවීමේ නිදහස තියෙන්න ඕනේ. අපි මේ ගැන චීනය සමඟ සෘජුවම සාකච්ඡා කරනවා.”

🔴 ඔස්ට්‍රේලියාවේ මැදිහත් වීම සහ නවසීලන්තයේ ස්ථාවරය.

නවසීලන්තයේ සමීපතම මිතුරා වන ඔස්ට්‍රේලියාවේ විදේශ ඇමතිනී Penny Wong චීනයේ මෙම තර්ජනාත්මක පියවර පිළිබඳව දැඩි කනගාටුව පළ කර ඇති අතර, කැන්බරා සහ බීජිං නුවර සිටින ඔස්ට්‍රේලියානු නිලධාරීන් හරහා ද මේ පිළිබඳව චීනයෙන් ප්‍රශ්න කරන බව ප්‍රකාශ කළාය.
කෙසේ වෙතත්, ඔස්ට්‍රේලියාවේ සහයෝගය අගය කරන අතරම, ලක්සන් පැහැදිලි කළේ මෙය නවසීලන්තය සහ චීනය අතර පවතින ද්විපාර්ශ්වික කරුණක් මිස කලාපීය හවුල්කාරිත්වයන්ට අදාළ කරගත යුතු නැති බවයි. නවසීලන්ත විදේශ කටයුතු අමාත්‍යාංශය (MFAT) දැනටමත් චීන බලධාරීන් වෙත සිය නිල විරෝධය පළ කිරීමට පියවර ගෙන ඇත.