නවසීලන්තයේ රජයේ ප්රධානතම ළමා ආරක්ෂක ආයතනය වන Oranga Tamariki ආයතනය පිළිබඳව සිදුකළ අභ්යන්තර විමර්ශනයකින් අතිශය කනගාටුදායක සහ බියකරු තොරතුරු රැසක් අනාවරණය වී තිබේ. දැඩි ලෙස හිංසනයට සහ අවදානමට ලක්ව සිටින, ජීවිත අවදානමක් පවතින බවට හඳුනාගත් දරුවන්ගේ සුවදුක් බැලීමට යා යුතු අනිවාර්ය නිල සංචාර සමාජ සේවා නිලධාරීන් විසින් දිගින් දිගටම මඟහැර ඇති බව මෙම වාර්තාව පෙන්වා දෙයි.
වාර්තාවට අනුව, ලිංගික හෝ ශාරීරික වදහිංසාවලට ලක්වීමේ දැඩි ප්රවණතාවක් ඇති නිවාසවල සිටින දරුවන් පරීක්ෂා කිරීම සඳහා පනවා ඇති නීත්යානුකූල කාලසීමාවන් නිලධාරීන් විසින් පැහැර හැර ඇත. බොහෝ අවස්ථාවලදී නියමිත දිනට නිලධාරීන් එම නිවාසවලට ගොස් නොමැති අතර, ඇතැම් අවස්ථාවල නිවසට ගියත් එහි කිසිවකු නොසිටියේ නම්, නැවත එම දරුවා ගැන සොයා බැලීමට සති කිහිපයක් හෝ මාස කිහිපයක් ගත කර තිබේ.
මෙම පරිපාලනමය සහ ක්රියාකාරී දුර්වලතාවය හේතුවෙන් අහිංසක දරුවන්ගේ ජීවිත සෘජුවම “මාරක අනතුරකට” ලක්ව ඇති බව විමර්ශන වාර්තාවේ පැහැදිලිවම සඳහන් වේ.
කෙසේ වෙතත්, සමාජ සේවකයන් පවසන්නේ මේ සඳහා නිලධාරීන්ට පමණක් දොස් පැවරිය නොහැකි බවයි. එක් නිලධාරියෙකුට හැසිරවීමට නොහැකි තරම් අධික වැඩ ප්රමාණයක් පැවරී තිබීම, ක්ෂේත්රයට ගොස් දරුවන් හමුවීමට වඩා කාර්යාල වැඩ සහ ලියකියවිලි පිරවීමට වැඩි කාලයක් වැය කිරීමට සිදුවීම සහ අත්දැකීම් බහුල නිලධාරීන් සේවය අතහැර යාම මීට ප්රධාන හේතු වී තිබේ.
නමුත් වාර්තාව අවධාරණය කරන්නේ, රාජකාරි පීඩනය කුමක් වුවත් දරුවෙකුගේ ජීවිතය අනතුරේ ඇති මොහොතක නිලධාරීන් සේවයට වාර්තා නොකිරීම කිසිසේත් සාධාරණීකරණය කළ නොහැකි බවයි.
ළමා ආරක්ෂක ආයතනයක් තමන්ගේ මූලිකම සහ පරම වගකීම වන “දරුවෙකුගේ ආරක්ෂාව පියවි ඇසින් දැක තහවුරු කරගැනීම” පැහැර හැරීම මහා අපරාධයකි. මෙම නිලධාරීවාදී නොසැලකිල්ල නිසා දරුවෙකුට ජීවිතයෙන් වන්දි ගෙවීමට සිදුවුවහොත් එහි වගකීම රජය භාරගත යුතු බවට මේ වන විට නවසීලන්තය තුළ දැඩි මහජන විරෝධයක් සහ කතාබහක් නිර්මාණය වී ඇත.
0 Comments