චණ්ඩ මාරුතය මැද නවසීලන්තයේ කැන්ටබරි කලාපය පුරා එකවර මහා ලැව්ගිනි රැසක් හටගනී!

නවසීලන්තයේ Canterbury කලාපය පුරා මේ දිනවල පවතින අසාමාන්‍ය වියළි කාලගුණය සහ චණ්ඩ මාරුතය හේතුවෙන් එකිනෙකට වෙනස් ස්ථාන අවම වශයෙන් අටක පමණ දරුණු ලැව්ගිනි හටගෙන තිබේ. මෙම ලැව්ගිනි පාලනය කිරීම සඳහා නවසීලන්ත ගිනි හා හදිසි සේවා බලකාය (FENZ) මේ වන විට දැවැන්ත මෙහෙයුමක් ආරම්භ කර ඇත.

කැන්ටබරියේ සිට Hurunui දිස්ත්‍රික්කය සහ Marlborough දක්වා මෙම ගිනි ව්‍යාප්ත වී තිබේ. ඉන් වඩාත්ම දරුණු තත්ත්වයක් වාර්තා වන්නේ හුරුනුයි හි Hawarden වනාන්තර ප්‍රදේශයෙනි. එහි හටගත් මහා ගින්න පාලනය කිරීම සඳහා ගිනි නිවන රථ 18ක් සහ හෙලිකොප්ටර් යානා යොදවා තිබුණි. මේ අතර Rolleston ප්‍රදේශයේ හටගත් ගින්නකින් ගොවිපළක ගබඩා කාමරයක් සහ විශාල ගස් පෙළක් මුළුමනින්ම විනාශ වී ඇත.

රාත්‍රී කාලය උදාවීමත් සමඟ හෙලිකොප්ටර් මඟින් ගිනි නිවීම් කටයුතු තාවකාලිකව නතර කර ඇති අතර, ගොඩබිම් කණ්ඩායම් දැඩි වෙහෙසක් ගනිමින් ගින්න තවදුරටත් ව්‍යාප්ත වීම වැළැක්වීමට සටන් වදිමින් සිටිති. වාසනාවකට මෙන්, පසුව ප්‍රදේශයට තරමක වැසි සහිත තත්ත්වයක් සහ සිසිල් කාලගුණයක් ලැබෙමින් පවතින බව වාර්තා වේ.

🔴 අළු යට සැඟවුණු ‘සොම්බි ගිනි’ (Zombie Fires) ගැන ජනතාවට අනතුරු ඇඟවීමක්!

ගිනි නිවන බලධාරීන් ප්‍රදේශයේ ගොවීන්ට සහ ජනතාවට හදිසි අනතුරු ඇඟවීමක් නිකුත් කර තිබේ. ඒ, පසුගිය සති දෙක තුළ කෘෂිකාර්මික කටයුතු සඳහා හෝ වෙනත් අවශ්‍යතා සඳහා එළිමහනේ ගිනි තැබීම් සිදුකළ ස්ථාන නැවත පරීක්ෂා කරන ලෙසයි.

පවතින දැඩි සුළඟ හේතුවෙන්, නිවී ගොස් ඇතැයි සිතන පැරණි අළු ගොඩවල් යට සැඟවී ඇති ගිනි පුපුරු (Zombie Fires) නැවත ඇවිළී මහා පරිමාණ ලැව්ගිනි බවට පත්වීමේ බරපතල අවදානමක් පවතින බව ඔවුහු පෙන්වා දෙති. එබැවින් දැනට නව ගිනි තැබීම් සම්පූර්ණයෙන්ම නතර කරන ලෙස බලධාරීන් ජනතාවගෙන් ඉල්ලා සිටියි.