ගෝලීය සහ දේශීය ආර්ථික වෙනස්වීම් සමඟ නිවාස ණය (Mortgage) පොලී අනුපාත නිරන්තරයෙන් උච්චාවචනය වන වත්මන් වටපිටාව තුළ, නවසීලන්තයේ නිවාස හිමියන් (Homeowners) තමන්ගේ ණය වාරික ස්ථාවර කරගැනීමේදී (Fixing interest rates) බරපතල වැරදි තීරණ ගනිමින් සිටින බව මූල්‍ය උපදේශකයින් පෙන්වා දෙයි.
බොහෝ නිවාස හිමියන් සිදුකරන ප්‍රධානතම වැරැද්දක් වන්නේ, වෙළඳපොළේ පවතින කෙටි කාලීන වාසි දෙස පමණක් බලා, දිගුකාලීන මූල්‍ය ප්‍රවණතා (Financial trends) පිළිබඳව නිසි අධ්‍යයනයකින් තොරව තම ණය පොලී අනුපාතයන් ස්ථාවර (Fix) කිරීමට කටයුතු කිරීමයි.

විශේෂඥයින් පවසන්නේ, බැංකු මගින් ලබාදෙන ආකර්ෂණීය කෙටි කාලීන දීමනාවලට හසුවී දිගුකාලීනව විශාල පාඩුවක් කරගන්නා පිරිස වර්තමානයේ ඉතා ඉහළ මට්ටමක පවතින බවයි.

තවත් පිරිසක් පොලී අනුපාත තවදුරටත් පහත වැටෙන තෙක් බලා සිටිමින්, සුදුසුම වේලාවේදී තීරණයක් ගැනීමට අපොහොසත් වීම නිසා අනවශ්‍ය ලෙස ඉහළ වාරික ගෙවීමට සිදුවීමේ අවදානමකට මුහුණ දී සිටිති.

“බොහෝ දෙනෙක් කරන්නේ අනුන් කරන දේ අනුකරණය කිරීමයි, නමුත් තමන්ගේ පෞද්ගලික ආදායම් මට්ටම සහ ඉදිරි සැලසුම්වලට අනුව ණය කළමනාකරණය කරන්නේ ඉතා සුළු පිරිසක්” යැයි මූල්‍ය විශ්ලේෂකයෝ පවසති.

මීට පිළියමක් ලෙස විශේෂඥයින් උපදෙස් දෙන්නේ, තම නිවාස ණය මුදල කොටස් කිහිපයකට කඩා (Split mortgage), විවිධ කාල සීමාවන් යටතේ ස්ථාවර පොලී අනුපාත (Fixed rates) සහ වෙනස් වන පොලී අනුපාත (Floating rates) ලෙස සමබරව කළමනාකරණය කර ගැනීම වඩාත් සුදුසු බවයි. එමගින් වෙළඳපොළේ සිදුවන ක්ෂණික වෙනස්වීම්වලින් සිදුවන මූල්‍ය බලපෑම අවම කර ගැනීමට නිවාස හිමියන්ට හැකියාව ලැබෙනු ඇත.