ඉහළ වැටුප් සහ යහපත් ජීවන තත්ත්වයක් සොයා නවසීලන්ත වැසියන් විශාල වශයෙන් ඕස්ට්‍රේලියාවට සංක්‍රමණය වීමේ රැල්ල ක්‍රමයෙන් මන්දගාමී වෙමින් පවතින බව ප්‍රමුඛ ආර්ථික විද්‍යාඥයෝ පෙන්වා දෙති. පසුගිය වසර කිහිපය පුරා ඕස්ට්‍රේලියානු ආර්ථිකය දැක්වූ කැපී පෙනෙන වර්ධනය හමුවේ දහස් සංඛ්‍යාත නවසීලන්ත ජාතිකයන් එරටට සංක්‍රමණය වූ අතර, පසුගිය වසරේදී පමණක් ශුද්ධ වශයෙන් නවසීලන්ත වැසියන් 28,500ක් ඕස්ට්‍රේලියාව බලා ගොස් තිබේ. කෙසේ වෙතත්, මේ වන විට ඕස්ට්‍රේලියාවේ පාරිභෝගික වියදම් අඩුවීම, නිවාස මිල ගණන් වෙනස්වීම් සහ පොලී අනුපාතික ඉහළ යාම හේතුවෙන් එම ආර්ථිකයේ පවතින ආකර්ෂණය අඩුවෙමින් පවතින අතර, දෙරට අතර පැවැති ආර්ථික පරතරය ද ක්‍රමයෙන් පටු වෙමින් පවතී.
BNZ බැංකුවේ ප්‍රධාන ආර්ථික විද්‍යාඥ මයික් ජෝන්ස් (Mike Jones) සඳහන් කරන්නේ නවසීලන්තයේ රැකියා ඇබෑර්තු ප්‍රමාණය නැවත ඉහළ යාමේ ප්‍රවණතාවක් පෙන්නුම් කරන අතර, ඕස්ට්‍රේලියාවේ රැකියා ඇබෑර්තු සීමා වෙමින් පවතින බවයි. එසේම, ඕස්ට්‍රේලියානු මහ බැංකුවේ තීරණ සමග එරට නිවාස දැරිය හැකි මට්ටම පහත වැටීම හේතුවෙන්, මීට පෙර නවසීලන්ත වැසියන් මුහුණ දුන් ප්‍රධානතම ගැටලුවක් වූ නිවාස අර්බුදය දැන් ඕස්ට්‍රේලියාවට ද තදින්ම බලපා තිබේ. Simplicity ආයතනයේ ප්‍රධාන ආර්ථික විද්‍යාඥ Shamubeel Eaqub පෙන්වා දෙන්නේ නිවාස සම්බන්ධයෙන් නවසීලන්තයේ පවතින ප්‍රතිපත්තිමය නම්‍යශීලීභාවය ඉදිරියේදී එරටට වාසිදායක විය හැකි බවයි.

කෙසේ වෙතත්, ANZ බැංකුවේ ජ්‍යෙෂ්ඨ ආර්ථික විද්‍යාඥ මයිල්ස් වෝර්ක්මන් (Miles Workman) අවධාරණය කරන්නේ ඉදිරි මාස 12-18 ඇතුළත නවසීලන්තයේ ආර්ථික වර්ධනය ඕස්ට්‍රේලියාව අභිබවා යාමට ඉඩ තිබුණද, දෙරට අතර පවතින ව්‍යුහාත්මක වැටුප් පරතරය කෙටි කාලීනව නැති කළ නොහැකි බවයි. විශාල ආර්ථිකයක් සහ ඉහළ ඒක පුද්ගල ආදායමක් හිමි ඕස්ට්‍රේලියාව තවමත් දක්ෂ වෘත්තිකයන්ට ඉහළ වැටුප් ලබා දෙන බැවින්, සංක්‍රමණ රැල්ල සම්පූර්ණයෙන්ම නතර කිරීමට නම් නවසීලන්තය සිය නිෂ්පාදනශීලීත්වය හා දිගුකාලීන ආර්ථික ප්‍රතිසංස්කරණ ශක්තිමත් කළ යුතු බව විද්වතුන්ගේ මතය වී තිබේ.