මව් පදවිය සහ මව් සෙනෙහස යනු කෙදිනකවත් මිනිස් ලෝකයට පමණක් සීමා වූවක් නොවේ. උපතින් ගෙනෙන ඒ අසංඛෙය්‍ය ලෙන්ගතුකම සහ මාතෘ සෙනෙහස සමස්ත සත්ව ලෝකයටම එක සේ පොදු වූ අතිශය සංවේදී හැඟීමකි. එම සත්‍යය නැවත වරක් ලෝකය හමුවේ තහවුරු කරමින්, මියගිය සිය සිඟිති පැටවාගේ වියෝව දරාගත නොහැකිව දින හයක් තිස්සේ පැටවාව සිය කරමත තබාගෙන මුහුදේ පිහිනූ ඩොල්ෆින් මවකගේ පුවතක් ඕස්ට්‍රේලියාවේ පර්ත් නගරයට ඔබ්බෙන් වූ මුහුදු තීරයෙන් වාර්තා වේ.

‘ෆ්‍රැග්ස්’ ලෙස සත්ව විද්‍යාඥයන් විසින් නම් කර ඇති මෙම ඩොල්ෆින් මව සිය මියගිය පැටවා කරමත හොවාගෙන මහ සමුද්‍රයේ පිහින යන අන්දම දැක්වෙන සංවේදී වීඩියෝ පටය පසුගියදා ජියෝග්‍රැෆි මැරීන් රිසර්ච් සංවිධානය මගින් අන්තර්ජාලයට මුදාහැර තිබේ. අධික ශීත කාලගුණය මධ්‍යයේ උපත ලබා ඇති සති දෙකක් පමණ වයසැති මෙම සිඟිති පැටවා නියුමෝනියා රෝගය වැළඳීමෙන් මියගොස් ඇති බව කියැවේ. මෙම ඩොල්ෆින් මවගේ පෙර පැටවුන් තිදෙනාමද නොයෙක් හේතූන් මත මියගොස් තිබූ අතර, මෙවර උපන් පැටවා හෝ ජීවත් කරවා ගැනීමට හැකිවනු ඇතැයි සත්ව විද්‍යාඥයන් මහත් බලාපොරොත්තු තබාගෙන සිටියහ.

නමුත් අවාසනාවන්ත ලෙස සිව්වැනි වතාවටත් සිය දරුවා අහිමි වීමේ අතිශය ඛේදනීය අත්දැකීමට මුහුණ දීමට ෆ්‍රැග්ස් හට සිදු විය. එම දරාගත නොහැකි වියෝවේ වේදනාව සහ නිහඬ ශෝකය ප්‍රකාශ කිරීම සඳහා ඇය මියගොස් සිටි පැටවාව දින හයක් තිස්සේ සිය සිරුර මත තබාගෙන මෙලෙස පීනා ගොස් ඇත. අතිශය සංවේදී දර්ශන පෙළක් වූ මෙය මේ වන විට සමාජ මාධ්‍ය තුළ ලොව පුරා දහස් ගණනකගේ අවධානයට සහ කම්පනයට හේතු වී තිබේ.