වික්ටෝරියා සිට ටොරොන්ටෝ දක්වා පියාසර කිරීමට නියමිතව තිබූ පෝටර් ගුවන් සේවයට (Porter Airlines) අයත් යානයක සිටි කුඩා දරුවෙකු අසුන්ගෙන seat belt පැළඳීම ප්‍රතික්ෂේප කිරීම හේතුවෙන්, ගුවන් යානය ගුවන්ගත කිරීම අත්හැර දමා සම්පූර්ණ ගමනම අවලංගු කිරීමට සිදුවීමේ පුවතක් කැනඩාවෙන් වාර්තා වේ. අගෝස්තු 6 වනදා රාත්‍රියේ සිදුවූ මෙම සිදුවීමත් සමඟ, එහි ගමන් කිරීමට සිටි සියලුම මගීන්ට පැය 24 කට ආසන්න කාලයක් ගුවන් තොටුපළේ ලැගුම් ගැනීමට සිදු වූ අතර, මෙය මේ වන විට ලොව පුරා දැඩි සංවාදයකට ලක්ව තිබේ.

වික්ටෝරියා ජාත්‍යන්තර ගුවන් තොටුපළෙන් (Victoria International Airport) පියාසර කිරීමට යානය ධාවන පථය දෙසට ගමන් කරමින් තිබියදී, මෙම කුඩා දරුවා අසුන මත නැගී සිටිමින් අසුන් ගැනීමට සහ සීට් බෙල්ට් පැළඳීමට එකඟ වී නොමැත. දරුවාගේ දෙමාපියන් මෙන්ම ගුවන් සේවකයින් ද අවස්ථා ගණනාවකදී දරුවා පාලනය කර ආරක්ෂිත ක්‍රමවේද අනුගමනය කිරීමට උත්සාහ කළද එය ව්‍යර්ථ විය. ගුවන් සේවා ආරක්ෂණ නීතිවලට අනුව ආසන පටි නොමැතිව ගුවන් යානයක් ගුවන්ගත කිරීම දැඩි අවදානම් සහගත බැවින්, නියමු කණ්ඩායම විසින් යානය නැවත පර්යන්තය (terminal) වෙත හරවා යැවීමට තීරණය කළහ.
යානය නැවත පර්යන්තයට පැමිණීමෙන් පසු අදාළ දරුවා සහ දෙමාපියන් ගුවන් යානයෙන් බැස්සවීම, ඔවුන්ගේ ගමන් මලු ඉවත් කිරීම සහ ඊට අදාළ නීතිමය ලේඛන කටයුතු සම්පූර්ණ කිරීමට සැලකිය යුතු කාලයක් ගත විය. එම කටයුතු නිම වන විට මධ්‍යම රාත්‍රී 12:30 පසු වී තිබූ අතර, වික්ටෝරියා ගුවන් තොටුපළේ ධාවන පථය රාත්‍රී කාලයට වසා දැමීමේ නීතිය හේතුවෙන් එම PD444 දරන ගුවන් ගමන සම්පූර්ණයෙන්ම අවලංගු කිරීමට සිදුවිය. එමගින් අනෙකුත් මගීන්ට පසුදින වෙනත් ගුවන් ගමන් ලැබෙන තෙක් රඳවා තැබීමට සිදුවිය.
ගුවන් යානයක් ගුවන්ගත වන විට හෝ ගොඩබස්වන විට ආරක්ෂිත පටි නොමැතිව සිටින කුඩා දරුවන් හදිසි තත්ත්වයකදී විසිවී යාමේ දැඩි අවදානමක් පවතින බැවින්, ගුවන් කාර්ය මණ්ඩලය ගත් මෙම තීරණය මගීන්ගේ ආරක්ෂාව වෙනුවෙන් නිවැරදිව ගන්නා ලද්දක් බව ගුවන් සේවා ආරක්ෂණ විශේෂඥයින් පෙන්වා දෙයි.

කෙසේ වෙතත්, කුඩා දරුවන් සමඟ ගුවන් ගමන්වල යෙදීමේදී දෙමාපියන්ගේ වගකීම සහ මෘදු දෙමාපිය සංකල්පය (soft parenting) මෙන්ම, මෙවැනි අවස්ථාවලදී ගුවන් සමාගම් කටයුතු කළ යුතු ආකාරය පිළිබඳව සමාජ මාධ්‍ය ඔස්සේ මේ වන විට විශාල සංවාදයක් ගොඩනැගෙමින් පවතී.