තමන්ගේ මුහුණේ පහළ කොටසේ “Notorious” යන ඉංග්‍රීසි වචනය විශාල ලෙස පච්ච කොටා ගැනීම නිසා මහත් ආන්දෝලනයට ලක්වූ, නවසීලන්තයේ කුප්‍රකට ‘Mongrel Mob’ පාතාල කල්ලියේ ප්‍රබල සාමාජිකයෙකු වූ පූටාවා කිරෙකා (Poutawa Kireka), අදාළ පාතාල කල්ලියෙන් නිල වශයෙන් ඉවත් වීමත් සමඟ ඔහුට ඇප මත නිදහස හිමිව තිබේ. ඔහුගෙන් සමාජයට තවදුරටත් දැඩි තර්ජනයක් එල්ල නොවන බවට නිගමනය කරමින් නවසීලන්ත ඇප මණ්ඩලය (Parole Board) විසින් මෙම තීරණය ගෙන ඇත්තේ, ඔහුගේ ප්‍රචණ්ඩකාරී අතීතය පිළිබඳව යම් යම් කංසාවන් පැවතුණද පුනරුත්ථාපන ප්‍රගතිය සැලකිල්ලට ගනිමින්ය.

39 හැවිරිදි කිරෙකා, පුද්ගල පැහැරගැනීම්, දරුණු ලෙස පහරදීම්, මත්ද්‍රව්‍ය ජාවාරම් කිරීම සහ බන්ධනාගාරගතව සිටියදී මත්ද්‍රව්‍ය හා ජංගම දුරකථන ජාවාරම් කිරීම යන චෝදනා රැසකට වරදකරු වෙමින් 2023 නොවැම්බර් මාසයේදී වසර 10යි මාස 10ක සිරදඬුවමකට යටත් විය. ප්‍රසිද්ධියේ සිය පෙම්වතියට පහර දෙමින් සිටි අවස්ථාවේදී එය වැළැක්වීමට පැමිණි 74 හැවිරිදි වයෝවෘද්ධ පුද්ගලයෙකුට සහ ඔහුගේ සහකාරියට සිදුකළ අමානුෂික ප්‍රහාරය මෙහි ප්‍රධාන සිදුවීමක් වූ අතර, පසුව සිදුකළ පොලිස් සෝදිසි කිරීම්වලදී ඔහුගේ නිවසින් මත්ද්‍රව්‍ය ජාවාරමෙන් උපයාගත් නවසීලන්ත ඩොලර් 109,766ක මුදලක් ද සොයාගැනුණි.

කෙසේ වෙතත්, අභියාචනාධිකරණය මගින් ඔහුගේ සිරදඬුවම් කාලය වසර 8යි මාස 2ක් දක්වා අඩුකිරීම සහ අවම ඇප හිමිකම් කාලසීමාව ඉවත් කිරීම හේතුවෙන් ඔහුට කලින් ඇප සඳහා ඉල්ලුම් කිරීමට අවස්ථාව හිමිවිය. ඔහුගෙන් නැවත ප්‍රචණ්ඩකාරී අපරාධයක් සිදුවීමේ මධ්‍යම ප්‍රමාණයේ අවදානමක් පැවතියද, ‘Mongrel Mob’ පාතාල කල්ලියෙන් නිල වශයෙන් ඉවත් වීම සහ පුනරුත්ථාපන වැඩසටහන්වලට සක්‍රියව දායක වීම පදනම් කරගෙන මෙම ඇප නියෝගය ලබාදී ඇත. දැඩි නිරීක්ෂණය, පාතාල සාමාජිකයින් ආශ්‍රය කිරීම තහනම් කිරීම ඇතුළු කොන්දේසි රැසකට යටත්ව හිමිවූ මෙම නිදහස, පාතාල කල්ලි අතහැර සාමාන්‍ය සමාජයට පැමිණෙන පුද්ගලයින් නැවත අපරාධවලට යොමුවේද යන්න පිළිබඳව කෙරෙන ප්‍රබල පරීක්ෂණයක් වනු ඇත.