නවසීලන්තයේ ප්‍රසිද්ධ සංචාරක නිකේතනයක සිදුවූ පස්කන්දක් කඩාවැටීමේ දරුණු අනතුරකින් පුද්ගලයින් හයදෙනෙකු ජීවිතක්ෂයට පත්වීම, වසර විස්සකට වැඩි කාලයක් තිස්සේ බලධාරීන් විසින් නොසලකා හරින ලද පද්ධතිමය අසාර්ථකත්වයක (systemic failure) ප්‍රතිඵලයක් බව නිල පරීක්ෂණ වාර්තාවකින් හෙළිවී තිබේ. තවුරංගා (Tauranga) හි පිහිටි මවුන්ට් මවුන්ගනුයි (Mount Maunganui) වෙරළාසන්න නිවාඩු නිකේතන භූමියට කඩාවැටුණු මෙම නායයාමෙන් 50 හැවිරිදි පාසල් ගුරුවරියක වූ ලීසා මැක්ලෙනන්, සුසාන් නොව්ල්ස් (71), ජැකලින් වීලර් (71), මොන්ස් ලෝක් බර්න්හාඩ්සන් (20), ෂැරන් මැකනිකෝ (15) සහ මැක්ස් ෆර්ස්-කී (15) යන අය අවාසනාවන්ත ලෙස මියගියහ. හිටපු මහා අධිකරණ විනිසුරු පෝල් ඩේවිසන් විසින් සූදානම් කරන ලද පිටු 263 කින් යුත් මෙම පරීක්ෂණ වාර්තාව මගින් පෙන්වා දෙන්නේ, නායයාමේ දැඩි අවදානමක් පවතින බවට භූ විද්‍යාඥයින් විසින් 1999 වසරේ සිටම තවුරංගා නගර සභාවට අවවාද කර තිබුණද, එම අනතුරු ඇඟවීම් ක්‍රියාත්මක කිරීමට නිලධාරීන් අපොහොසත් වී ඇති බවයි.

අධික වර්ෂාවත් සමඟ මඩ සහ පස්කඳු කඩාවැටීමට පෙර පවා කුඩා නායයාම් සිදුවෙමින් පැවැති අතර, අවදානම පිළිබඳව අමුත්තන් දැනුවත් කිරීමට හෝ ඔවුන්ව ආරක්ෂිත ස්ථාන කරා ඉවත් කිරීමට පූර්ව හදිසි කල්තියා දැනුම්දීමේ ක්‍රමවේදයක් (Trigger Action Response Plan) සකස් කර නොතිබීම මෙම ව්‍යසනයට සෘජුවම බලපෑවේය. අනතුර සිදුවූ මොහොතේ මියගිය ලීසා මැක්ලෙනන් ඇතුළු පිරිස අන් අයගේ ජීවිත බේරා ගැනීමට දැඩි වෙහෙසක් ගෙන තිබුණද, පද්ධතියේ තිබූ අඩුපාඩු නිසා එම උත්සාහයන් ව්‍යර්ථ විය. මෙම සිදුවීම වළක්වා ගැනීමට තිබූ එකක් බව පිළිගනිමින් තවුරංගා නගරාධිපති මහේ ඩ්‍රයිස්ඩේල් සහ ප්‍රධාන විධායක මාටි ග්‍රෙන්ෆෙල් මියගිය අයගේ පවුල්වලින් නිල වශයෙන් සමාව අයැද සිටියහ. රජයේ ආයතනයක් ලෙස නගර සභාව මහජන ආරක්ෂාව නොසලකා හැරීම සම්බන්ධයෙන් මෙම වාර්තාව මගින් දැඩි ලෙස දෝෂදර්ශනයට ලක්කර ඇති අතර, පොලිසිය සහ සේවා ස්ථාන ආරක්ෂණ අධිකාරිය මගින් ද මේ පිළිබඳ වැඩිදුර පරීක්ෂණ පවත්වයි.