නවසීලන්තයේ ඕක්ලන්ඩ් නගරයේ නවතම නගර අභ්‍යන්තර දුම්රිය මාර්ගය (City Rail Link – CRL) මහජන අයිතියට පත් කළ මුල්ම සතිඅන්තයේ උදෑසන, සාමාන්‍ය ප්‍රමාණයට වඩා දෙගුණයකටත් වඩා වැඩි මගීන් පිරිසක් පැමිණීමෙන් දැවැන්ත මගී තදබදයක් සහ උද්යෝගයක් නිර්මාණය විය. කිලෝමීටර 3.45 ක දිගකින් යුත් මෙම භූගත ද්විත්ව උමං දුම්රිය පද්ධතිය විවෘත කිරීමත් සමඟ, නවසීලන්ත දුම්රිය ක්ෂේත්‍රයේ දශක ගණනාවකට පසු සිදු වූ විශාලතම පරිවර්තනය ස සටහන් විය.
එදින උදෑසන සිටම වයිතෙමාතා (Waitematā – Britomart) සහ අලුතින් සංවර්ධනය කරන ලද මවුංගාව්හවු (Maungawhau – Mt Eden) ඇතුළු ප්‍රධාන දුම්රිය ස්ථාන මගීන්ගෙන් පිරී පැවැති අතර, නව කාලසටහනට අනුව ධාවනය වූ දුම්රිය වෙත මගීන් යොමු කිරීමට ඕක්ලන්ඩ් ප්‍රවාහන (Auckland Transport) බලධාරීහු කටයුතු කළහ. මෙම නව භූගත මාර්ග පද්ධතිය නිසා මීට පෙර විනාඩි 45 ක් පමණ ගත වූ ගමනාගමන කාලය විනාඩි 15 කටත් වඩා අඩු කාලයක් දක්වා සැලකිය යුතු ලෙස අඩු වී තිබේ.
ප්‍රධාන වේලාවන්හිදී (Peak hours) මිනිත්තු 7 ත් 8 ත් අතර කාල පරතරයකින් දුම්රිය ධාවනය කිරීම නිසා මගීන් සංඛ්‍යාව දෙගුණයකින් ඉහළ ගියද තදබදය සාර්ථකව පාලනය කර ගැනීමට හැකි විය. නගරයේ මහාමාර්ගවල පවතින රථවාහන තදබදයට ස්ථිර විසඳුමක් ලෙස ඉදිකෙරුණු මෙම ව්‍යාපෘතිය, ඕක්ලන්ඩ් නගරයේ පොදු ප්‍රවාහන ක්ෂේත්‍රයේ නව යුගයක ඇරඹුම සලකුණු කරයි.
0 Comments