“වෘත්තිකයන් බිහිකරන අයට නිසි ඇගයීමක් නෑ”නවසීලන්තයෙන් ඇසෙන දැවැන්ත වෘත්තීය අරගලය!

වැටුප් කප්පාදුවට සහ රැකියා අවිනිශ්චිතතාවට එරෙහිව නවසීලන්තයේ විශ්වවිද්‍යාල සහ Polytechnic ආයතනවල ආචාර්ය, මහාචාර්යවරුන් ඇතුළු අධ්‍යයන හා අනුබද්ධ කාර්ය මණ්ඩල අඟහරුවාදා පස්වරුවේ දැවැන්ත වෘත්තීය සමිති ක්‍රියාමාර්ගයක නිරත විය. තෘතීයික අධ්‍යාපන සංගමය (TEU) විසින් සංවිධානය කරන ලද මෙම සංකේත වැඩවර්ජනය සඳහා රට පුරා විසිරී සිටින 8,000 කට ආසන්න සාමාජික පිරිසක් පස්වරු 1.15 සිට 5.00 දක්වා දේශන ශාලා සහ පර්යේෂණාගාරවලින් ඉවත් වී එකතු වූ අතර, මෙය නවසීලන්ත ඉතිහාසයේ විශ්වවිද්‍යාල සහ බහුශාස්ත්‍රීය කාර්ය මණ්ඩල එක්ව දියත් කළ පළමු ඒකාබද්ධ වෘත්තීය ක්‍රියාමාර්ගය ලෙස වාර්තා වේ.

පවතින අධික ජීවන වියදම් හමුවේ කළමනාකාරීත්වය විසින් යෝජනා කර ඇති වැටුප් වර්ධක කිසිසේත්ම ප්‍රමාණවත් නොවන බවත්, ඒවා සැබැවින්ම නාමික වැටුප් කප්පාදුවක් බවත් තෘතීයික අධ්‍යාපන සංගමයේ ජාතික ලේකම් ඇමී රොස් (Amy Ross) පවසයි. රටට අවශ්‍ය වෛද්‍යවරුන්, ඉංජිනේරුවන්, ගුරුවරුන්, හෙදියන් සහ අනෙකුත් වෘත්තිකයන් බිහිකරන ආචාර්ය මණ්ඩලයේ ශ්‍රමය නිසි ලෙස ඇගයීමට ලක්කළ යුතු බව අවධාරණය කළ ඇය, විශ්වවිද්‍යාල ක්ෂේත්‍රයේ 54.8% කට ආසන්න ප්‍රතිශතයක් තාවකාලික හෝ අනියම් පදනම මත සේවයේ යෙදවීම දැඩි රැකියා අවිනිශ්චිතතාවක් නිර්මාණය කර ඇති බව ද පෙන්වා දුන්නාය.

රටේ උද්ධමනයට සරිලන පරිදි වැටුප් නොලැබීම සහ තාවකාලික සේවා ගිවිසුම් මත වසර ගණනාවක් සේවය කිරීමට සිදුවීම නිසා සේවකයන් දැඩි මානසික පීඩනයකට ලක්ව සිටින බව සංගමයේ ජාතික සභාපති තී ලමූස් (Ti Lamusse) සඳහන් කළේය. වසර අටකට වැඩි කාලයක් ස්ථිර පත්වීමක් නොමැතිව වැදගත් පර්යේෂණවල නිරත වන ප්‍රමුඛ පෙළේ විද්‍යාඥයන් පවා මෙම අර්බුදයට මුහුණ දී සිටින බවත්, සේවකයන්ට සාධාරණ වැටුප් වැඩිවීම් ලබාදීමට තරම් මූල්‍ය ශක්තියක් පාලනාධිකාරිය සතුව පැවතියද ඔවුන් නිවැරදි ප්‍රමුඛතා හඳුනාගෙන නොමැති බවත් හෙතෙම චෝදනා කළේය.

මේ අතර, ඕක්ලන්ඩ් විශ්වවිද්‍යාලය (University of Auckland), යූකොල් (UCOL) සහ මනුකාව් තාක්ෂණික ආයතනය (MIT) ඇතුළු පාලනාධිකාරීන් ප්‍රකාශ කළේ සේවකයන්ගේ වෘත්තීය අයිතිවාසිකම්වලට ගරු කරන අතරම සාකච්ඡා මාර්ගයෙන් ගැටලු විසඳා ගැනීමට කටයුතු කරන බවයි. අධ්‍යයන වර්ෂයේ වැදගත් කාලපරිච්ඡේදයක් බැවින් සිසුන්ගේ අධ්‍යාපන කටයුතුවලට සිදුවන බලපෑම අවම කිරීමට පියවර ගෙන ඇති බව ද උසස් අධ්‍යාපන ආයතන වැඩිදුරටත් සඳහන් කළේය.