වසර 26කට පෙර පාසල් සිසුන් පිරිසක් විසින් සඟවා තබන ලද අපූරු මතක සෙප්පුවක් (Time Capsule) අහම්බෙන් හමු වූ පුවතක් නවසීලන්තයේ ග්‍රාමීය ප්‍රදේශයකින් වාර්තා වන අතර, එය මේ වන විට ලොව පුරා බොහෝ දෙනෙකුගේ අවධානය දිනාගැනීමට සමත්ව තිබේ. නවසීලන්තයේ වයිකාටෝ (Waikato) කලාපයේ පිහිටි වෝල්ටන් පාසලෙන් (Walton School) හමු වූ මෙම විශේෂ මතක එකතුව, 1999 වසරේදී එහි 5 සහ 6 ශ්‍රේණිවල ඉගෙනුම ලැබූ සිසුන් පිරිසක් විසින් නිර්මාණය කරන ලද්දකි.
සහශ්‍රයේ ආරම්භයේදී සකස් කළ මෙම මතක සෙප්පුව තුළ සිසුන් තමන්ගේ අනාගතය වෙනුවෙන් ලියන ලද පෞද්ගලික ලිපි රැසක් අඩංගු වූ අතර, 90 දශකයේ අගභාගයේ ඔවුන් ප්‍රිය කළ රූපවාහිනී වැඩසටහන්, රංගන ශිල්පීන්, ආහාර මෙන්ම ඔවුන්ගේ අනාගත සිහින, රැකියා සහ සංචාරය කිරීමට ආශා කළ ස්ථාන පිළිබඳ තොරතුරු ද ඊට ඇතුළත් කර තිබුණි.
ඩිජිටල් තාක්ෂණය ප්‍රචලිත වීමට පෙර පැවැති සරල අතීතය පිළිබඳ සුන්දර මතකයන් අවදි කරන මෙම පුවත සමාජ මාධ්‍ය ඔස්සේ ක්ෂණිකව ජනප්‍රිය විය. පාසලේ විදුහල්පති මැට් ගීනි (Matt Geaney) සඳහන් කළේ එහි තිබී හමු වූ ලිපි 24 අතුරින් 5ක අයිතිකරුවන් මේ වන විට සාර්ථකව සොයාගැනීමට හැකි වූ බවයි.
වසර 26කට පෙර කුඩා දරුවන් කළ ඉල්ලීමට ගරු කරමින්, එම ලිපිවල අයිතිකරුවන්ට හැර වෙනත් කිසිදු අයෙකුට ඒවා විවෘත කිරීමට පාසල් බලධාරීන් ඉඩ දී නොමැත. අතීත සිහින නැවත මතක් කරගැනීමේ මෙම සංවේදී පියවරත් සමඟ, දැනට වෙනත් ප්‍රදේශවල සහ ඔස්ට්‍රේලියාවේ පදිංචිව සිටින අදාළ පැරණි සිසුන් වෙත එම ලිපි ඩිජිටල් තාක්ෂණය ඔස්සේ යොමු කිරීමට ද පියවර ගෙන තිබේ. කුඩා දරුවන්ගේ සුන්දර බලාපොරොත්තු අනාගතය හා යා කරන මෙම පුවත, අතීත මතකයන් සොයා යන බොහෝ දෙනෙකුගේ හදවත් සපිරි සංවේදී මතකයක් බවට පත්ව ඇත.
ඔබත් එවැනි සුන්දර අතීතයකට හිමිකම් කියන කෙනෙක්ද?
0 Comments