කූඩාරම්, මෝටර් රථ සහ දැඩි ලෙස සිරවූ කුලී කාමරවල අසීරු ජීවිත ගෙවූ උතුරු නවසීලන්තයේ පවුල් රැසකට ස්ථාවර සහ උණුසුම් නිවසක සිහිනය සැබෑ වී තිබේ. ඒ, Whangārei හි Kauika පාරේ ඩොලර් මිලියන 75ක වියදමින් ඉදිවුණු, කලාපීය නවසීලන්තයේ විශාලතම සමාජ නිවාස ව්යාපෘතිය (Kāinga Ora Complex) නිල වශයෙන් විවෘත කිරීමත් සමඟයි.
නිවාස 95කින් සමන්විත මෙම දැවැන්ත සංකීර්ණය තුළ පුද්ගලයන් 320කට පමණ ආරක්ෂිත නවාතැන් ලැබී ඇත. මේ හරහා නගරයේ දැඩි ලෙස පැවති කාමර එකේ සහ දෙකේ නිවාස හිඟයට ස්ථාවර විසඳුමක් ලැබී තිබේ.
🔴 ජීවිත වෙනස් කළ නව බලාපොරොත්තුව.
මෙම නිවාස සංකීර්ණය පාසල්, වෙළෙඳසල්, ප්රවාහන සේවා සහ සෞඛ්ය මධ්යස්ථානවලට ආසන්නව පිහිටා ඇති බැවින් අඩු ආදායම්ලාභී පවුල්වල ප්රවාහන සහ ජීවන වියදම් විශාල ලෙස අඩු කර ගැනීමට මඟ පෑදේ.
Kāinga Ora ආයතනයේ උතුරු කලාපීය අධ්යක්ෂ Jeff Murray පෙන්වා දෙන්නේ වියළි, උණුසුම් නිවසක් ලැබීම දරුවන්ගේ සෞඛ්ය තත්ත්වය ඉහළ නැංවීමටත්, ඔවුන්ගේ අධ්යාපනය සහ දෙමාපියන්ගේ රැකියා ස්ථාවරත්වයටත් සෘජුවම බලපාන බවයි.
වසර දෙකක සිය පුතු සමඟ මෙහි පදිංචියට ආ තනි පියෙකු වන Tamati Herewini-Murray සිය සතුට මෙසේ ප්රකාශ කළේය:
“මටයි මගේ පුතාටයි මේක සැබෑ ස්ථාවරත්වයක්. අපිටම කියලා කියන්න පුළුවන්, ආදරය සහ ආරක්ෂාව පිරුණු නිවසක් දැන් අපිට තියෙනවා.”
🔴 ප්රතිපත්ති වෙනස්වීම් මැද ආ ආශ්චර්යයක්.
ළමා ක්රීඩාංගණ, ප්රජා උද්යාන සහ ආබාධිත පුද්ගලයන් සඳහා විශේෂයෙන් සැලසුම් කළ නිවාස 14කින් ද යුත් මෙම ව්යාපෘතිය Whangārei නගරයට විශාල ජයග්රහණයකි. කෙසේ වෙතත්, රජයේ මූල්ය ප්රතිපත්ති සහ වියදම් සීමා කිරීම් හේතුවෙන් ඉදිරියේදී මෙවැනි දැවැන්ත සමාජ නිවාස ව්යාපෘති කලාපීය මට්ටමින් ආරම්භ කිරීම සීමා වනු ඇතැයි පැවසේ. එබැවින්, තවමත් නිවාස බලාපොරොත්තුවෙන් සිටින සිය ගණනක් ජනතාව වෙනුවෙන් නිමවුණු මෙම ව්යාපෘතිය සැබවින්ම වටිනා ජීවන රක්ෂණයකි.
0 Comments