නවසීලන්තයේ Auckland නගරයේ North Shore ප්‍රදේශයේ ස්ථාන දෙකක සිදුවූ දරුණු ප්‍රහාර මාලාවකින් පුද්ගලයින් දෙදෙනෙකු ජීවිතක්ෂයට පත්ව තවත් අයෙකු තුවාල ලබා ඇති අතර, සිද්ධිය සම්බන්ධයෙන් 41 හැවිරිදි පුද්ගලයෙකු අත්අඩංගුවට ගෙන තිබේ. ජූලි 28 වැනි අඟහරුවාදා රාත්‍රී 8:20 ට පමණ Birkdale හි Seon Place හි නිවසක සිදුවූ පිහි ඇනුමක් පිළිබඳව ලද තොරතුරකට අනුව ක්‍රියාත්මක වූ පොලිසිය, එම ස්ථානයේදීම තුවාලකරු සොයාගෙන නෝත් ෂෝර් රෝහලට ඇතුළත් කිරීමට කටයුතු කළ අතර ප්‍රහාරයට සම්බන්ධ සැකකරුද එතැනදීම අත්අඩංගුවට ගන්නා ලදී.

එම ස්ථානයේදී ලද තොරතුරු මත පදනම්ව, පොලිසිය වහාම කිලෝමීටර් පහක් පමණ දුරින් පිහිටි Glenfield හි Lingfield Street පිහිටි වෙනත් නිවසක් පරීක්ෂා කිරීමේදී, එහි තිබී මියගිය පිරිමි පුද්ගලයෙකුගේ සහ කාන්තාවකගේ සිරුරු සොයාගැනීමට හැකි විය. මෙම ද්විත්ව ඝාතනය සම්බන්ධයෙන් අත්අඩංගුවට ගත් 41 හැවිරිදි සැකකරුට එරෙහිව ඝාතන චෝදනා දෙකක් සහ ඝාතනය කිරීමට තැත් කිරීමේ චෝදනාවක් යටතේ නෝත් ෂෝර් මහේස්ත්‍රාත් අධිකරණයේදී නඩු පවරා ඇත.

සිද්ධිය සම්බන්ධයෙන් අදහස් දක්වමින් වැඩබලන පරීක්ෂක Megan Goldie සඳහන් කළේ, මියගිය අය සහ සැකකරු එකිනෙකා හඳුනන අය වන බැවින් මහජනතාවට අතිරේක ආරක්ෂක තර්ජනයක් නොමැති බවයි. එම ස්ථාන දෙකෙහිම දැනට අධිකරණ වෛද්‍ය පරීක්ෂණ සහ වැඩිදුර පොලිස් විමර්ශන සක්‍රියව සිදුකෙරෙමින් පවතී.