දකුණු ඕක්ලන්ඩ් හි Papatoetoe ප්‍රදේශයේ පිහිටි නිවසක් ඇතුළත තිබී එකම පවුලේ තිදෙනෙකුගේ සිරුරු සොයාගැනීමේ අතිශය ශෝකජනක පුවතක් නවසීලන්තයෙන් වාර්තා වේ. බ්‍රහස්පතින්දා පස්වරු 6:40 ට පමණ කේම්බ්‍රිජ් ටෙරස් හි පිහිටි අදාළ නිවසේ පුද්ගලයෙකු මියගොස් සිටින බවට ලැබුණු පළමු තොරතුරකට අනුව පොලිසිය සහ ගිනි නිවීමේ සේවා එම ස්ථානයට ළඟා වී ඇති අතර, එහිදී නිවස තුළ තිබී තවත් සිරුරු දෙකක් සොයාගැනීමට ආරක්ෂක අංශ සමත් විය.
සෙසු අසල්වැසියන් මහත් කම්පනයට පත්කරමින් පොලිස් පරීක්ෂක කණ්ඩායම්, ගිලන්රථ සහ ගිනි නිවීමේ රථ කිහිපයක්ම එම ස්ථානයට ළඟා වූ අතර, එම පරිශ්‍රය වහාම ආරක්ෂිත කලාපයක් ලෙස නම් කෙරිණි. මියගිය තිදෙනාම එකම පවුලේ සාමාජිකයින් බව මනුකාවු දිස්ත්‍රික් පොලිස් අධිකාරී ෂැනන් ග්‍රේ (Shanan Gray) තහවුරු කළ අතර, අදාල පවුලේ ඥාතීන් මේ වන විට දැඩි මානසික කම්පනයකට ලක්ව සිටින බව ද සඳහන් කළේය.
පොලිස් පරීක්ෂක කැරන් බ්‍රයිට් (Karen Bright) පැවසුවේ මෙය මනුෂ්‍ය ඝාතන සිද්ධියක් ලෙස සලකා මූලික විමර්ශන ආරම්භ කර ඇති නමුත්, සිද්ධිය සම්බන්ධයෙන් පිටස්තර සැකකරුවන් කිසිවෙකු සෙවීමට අවශ්‍ය නොවන බවත්, ප්‍රදේශවාසීන්ට වෙනත් කිසිදු ආරක්ෂක තර්ජනයක් නොමැති බවත් ය.
මෘතදේහයන් පිළිබඳ නිල හඳුනාගැනීමේ කටයුතු සහ පවුලේ ඥාතීන් දැනුවත් කිරීමේ පියවර තවදුරටත් ක්‍රියාත්මක වන බැවින් මියගිය පුද්ගලයින්ගේ තොරතුරු මෙතෙක් ප්‍රසිද්ධ කර නොමැත. පොලිස් සහ වෝහාරික වෛද්‍ය විශේෂඥයින් සිද්ධිය වූ ස්ථානයේ සියුම් පරීක්ෂණ පවත්වමින් සිටින අතර, අසල්වාසීන් විස්තර කරන්නේ මියගිය අය ඉතා යහපත් පවුලක් ලෙස ප්‍රදේශයේ ජීවත් වූ බවයි. මෙම ඛේදනීය සිදුවීමත් සමඟ පැපටොයිටොයි සමස්ත ප්‍රජාවම දැඩි ශෝකයකට පත්ව සිටින අතර, පීඩාවට පත් පවුලේ සාමාජිකයින්ට සහ අසල්වැසියන්ට අවශ්‍ය උපකාර ලබාදීමට දේශීය සංවිධාන ඉදිරිපත් වී තිබේ.
0 Comments