පවුල් ප්‍රචණ්ඩත්වය හඳුනා ගැනීම සහ ඉහළ අවදානම් සහිත තත්ත්වයන් පාලනය කිරීම සඳහා රාජ්‍ය ආයතන කිහිපයක් එක්ව ක්‍රියාත්මක කිරීමට සැලසුම් කර තිබූ බහු-මිලියන ඩොලර් තාක්ෂණික ව්‍යාපෘතියක් නවසීලන්ත රජය විසින් අත්හිටුවා තිබේ. රජයේ ආයතන අතර රහස්‍ය තොරතුරු ආරක්ෂිතව හුවමාරු කර ගනිමින්, අවදානමට ලක්වූ දරුවන් සහ පවුල් ආරක්ෂා කිරීම වෙනුවෙන් “ප්‍රොජෙක්ට් වේටූ” (Project Whetū) නමින් හඳුන්වා දුන් මෙම ඒකාබද්ධ වැඩසටහන වෙනුවෙන් පසුගිය වසර දෙක තුළ ඩොලර් මිලියන 2 කට ආසන්න මුදලක් වැය කර තිබිණි.
කෙසේ වෙතත්, මෙම පද්ධතිය පවත්වාගෙන යාම සඳහා ඉදිරියට නඩත්තු සහ මුදල් ප්‍රතිපාදන වෙන්කිරීමේ ප්‍රායෝගික අපහසුතාව හේතුවෙන් ව්‍යාපෘතිය අත්හිටුවීමට පවුල් සහ ලිංගික ප්‍රචණ්ඩත්වය තුරන් කිරීමේ විධායක මණ්ඩලය තීරණය කර ඇති අතර, වෙන් කර තිබූ ඉතිරි ඩොලර් මිලියන 5.2 ක මුදල නැවත රජයේ භාණ්ඩාගාරයට බාරදී ඇත.
මෙම තීරණය සම්බන්ධයෙන් අදහස් දක්වමින් පවුල් සහ ලිංගික ප්‍රචණ්ඩත්වය වැළැක්වීමේ අමාත්‍ය කැරන් චූර් (Karen Chhour) සඳහන් කළේ, තාක්ෂණික පද්ධතිය අත්හිටෙව්වද පෙරමුණේ සිටින සුභසාධන සේවාවන්ට බාධාවක් සිදු නොවන බවයි. පවතින රාමුව යටතේ උපදෙස් මාලා සහ තොරතුරු හුවමාරු කිරීමේ ප්‍රතිපත්ති ඉදිරියටත් ක්‍රියාත්මක වන බවත්, අනාගතයේදී සුදුසු නඩත්තු ක්‍රමවේදයක් සකස් වුවහොත් මෙම පද්ධතිය නැවත ආරම්භ කිරීමට හැකි බවත් ඇය වැඩිදුරටත් පැවසුවාය. කෙසේ වෙතත්, නව පද්ධතියක් නොමැතිවීම නිසා ආයතන අතර තොරතුරු හුවමාරුව සීමා වී අවදානම් තත්ත්වයන් නිසි ලෙස තක්සේරු කිරීමට නොහැකි වීම සහ දත්ත ආරක්ෂණ ගැටලු මතුවීමේ දැඩි අවදානමක් පවතින බව නිලධාරීන්ගේ අභ්‍යන්තර වාර්තා පෙන්වා දෙයි.
පවතින තාක්ෂණික පද්ධතිය අත්හිටුවීම හේතුවෙන් ආයතනවලට තාවකාලික පියවරක් ලෙස එක්සෙල් (Excel) පදනම් කරගත් දත්ත පද්ධතියක් භාවිත කිරීමට සිදුවී ඇති අතර, මෙම තීරණය විපක්ෂයේ දැඩි දෝෂදර්ශනයට ලක්ව තිබේ. ලේබර් පක්ෂයේ පොලිස් ප්‍රකාශිකා ජිනී ඇන්ඩර්සන් (Ginny Andersen) ප්‍රකාශ කළේ, ආයතන අතර තොරතුරු නිසි ලෙස හුවමාරු නොවීමෙන් අවදානමට ලක්වූ ජනතාව පද්ධතියෙන් ගිලිහී ගොස් දැඩි විනාශකාරී ප්‍රතිඵල ඇතිවිය හැකි බවයි. නවසීලන්තය පුරා පවුල් ප්‍රචණ්ඩත්වයට එරෙහිව ක්‍රියාත්මක වන රාජ්‍ය ආයතන තවදුරටත් සාම්ප්‍රදායික ක්‍රමවේද මත යැපීමට සිදුවීම හේතුවෙන්, බහු-ආයතනික සම්බන්ධීකරණය සහ අවදානම් කළමනාකරණය ඉදිරියේදී දැඩි අභියෝගයකට ලක්වනු ඇත.
0 Comments