වසර 37කට පෙර 16 හැවිරිදි දැරියක දූෂණය කළ “නමක් නැති” අතවර කරන්නා කවුදැයි හඳුනා ගැනීමට නවසීලන්ත පොලිසිය සමත්ව තිබේ. ඒ අනුව, නවසීලන්තයේ කුප්‍රකට අපරාධකරුවෙකු වන මැල්කම් රීවා හට එම
ප්‍රහාරය සම්බන්ධයෙන් අද (සිකුරාදා) ඕක්ලන්ඩ් මහාධිකරණයේදී දඬුවම් නියම කිරීමට නියමිතය.
සිදුවීම සැකෙවින්
1988 ජුනි 18 වැනිදා ඕනෙහුංගා හි පැවැති උපන්දින සාදයකට සහභාගී වී සිටි 16 හැවිරිදි දැරියකට, නාඳුනන පුද්ගලයෙකු විසින් ලණුවකින් ගෙල සිරකර දරුණු ලෙස අතවර කර තිබුණි.
එකල DNA දත්ත බැංකුවක් නොතිබීම නිසා අපරාධකරු හඳුනා ගැනීමට පොලිසිය අසමත් විය. ඇය වසර 37ක් තිස්සේ ජීවත් වූයේ තමාට විනාශය කළ පුද්ගලයා කවුදැයි නොදැන ය.
පසුගිය වසරේදී අදාළ කාන්තාව සිය චිකිත්සකවරියගේ උපදෙස් මත පොලිසියට කතා කර, එදා ලබාගත් සාම්පල තවමත් තිබේදැයි විමසා ඇත. එහිදී සිදුකළ DNA පරීක්ෂාවකින් තහවුරු වූයේ ඇගේ දූෂකයා මේ වන විටත් සිරදඬුවම් විඳින මිනීමරු මැල්කම් රීවා බවයි.
මැල්කම් රීවා කවුද?
මැල්කම් රීවා යනු 1992 දී සුසෑන් බර්ඩෙට් ඝාතනය කිරීම සම්බන්ධයෙන් ජීවිතාන්තය දක්වා සිරදඬුවම් විඳින අයෙකි. මීට අමතරව කාන්තාවන් 25 දෙනෙකුට ලිංගික අතවර කිරීම සම්බන්ධයෙන්ද ඔහු වැරදිකරු වී සිටී.
“වසර 37කට පසු මට මුහුණක් සහ නමක් ලැබුණා. මට දැනෙන්නේ විශාල සහනයක්,” යැයි ඇය පවසයි. තවමත් ඉදිරියට නොපැමිණි වෙනත් වින්දිතයන් සිටී නම්, ලැජ්ජාව ඔබ සතු නොවන බවත්, යුක්තිය වෙනුවෙන් කතා කරන ලෙසත් ඇය ඉල්ලා සිටියි.
0 Comments