නවසීලන්තයේ පාසලක වැසිකිළි සංකීර්ණයක් තුළදී සිදු වූ අතිදරුණු “බුලි කිරීමේ” (Bullying) හෙවත් සිසුන් කණ්ඩායමක් විසින් තවත් සිසුවෙකුට හිරිහැර කර පහරදීමේ සිදුවීමක් නිසා කුඩා පිරිමි දරුවෙකුගේ පාදයක් බිඳී ගොස් තිබේ. මෙම අමානුෂික ප්රහාරය මුළු රටේම මවුපියන්ගේ දැඩි කෝපයට හා කණගාටුවට හේතු වී ඇත.
සාමාන්ය පාසල් දිනයක, ගුරුවරුන්ගේ හෝ විනය පාලකයන්ගේ ඇසට නොපෙනෙන පාසල් වැසිකිළිය තුළදී මෙම දරුවාව වෙනත් සිසුන් කණ්ඩායමක් විසින් කොටු කරගෙන තිබේ. එහිදී සිදු වූ දරුණු ශාරීරික පහරදීම නිසා දරුවාගේ කකුලක් කැඩී ගොස් ඇති අතර, සිරුර පුරා තුවාල සහ සීරීම් සලකුණු පිරී තිබුණි. වහාම ක්රියාත්මක වූ හදිසි ගිලන්රථ සේවය මඟින් දරුවාව රෝහල්ගත කළ අතර, එහිදී කරන ලද එක්ස්-රේ (X-ray) පරීක්ෂණ මඟින් පාදයේ අස්ථි බිඳීම තහවුරු විය.
“එයා පාසල් ගියේ ඉගෙන ගන්න, යාළුවෝ එක්ක සෙල්ලම් කරන්න. නමුත් එයාට ගෙදර එන්න වුණේ ඇම්බියුලන්ස් එකක,” යැයි පීඩාවට පත් දරුවාගේ පවුලේ ප්රකාශකයෙකු දැඩි සංවේගයෙන් පැවසීය. ශාරීරික තුවාල සුව වුවද, ආරක්ෂාව දිය යුතු පාසල කෙරෙහි දරුවාගේ සිතේ ඇති වූ බිය සහ මානසික කම්පනය සුව කිරීම අපහසු බව ඔවුහු පවසති. මෙය හදිසියේ සිදු වූවක් නොව, කලක පටන් සිදු වූ හිරිහැර කිරීම්වල උච්චතම අවස්ථාව බවද පවුලේ අය චෝදනා කරති.
පාසල් බලධාරීන් සහ අධ්යාපන අමාත්යාංශය මේ සම්බන්ධයෙන් විශේෂ අභ්යන්තර පරීක්ෂණයක් ආරම්භ කර ඇති අතර, සිද්ධියට සම්බන්ධ සිසුන්ට දැඩි විනය පියවර ගන්නා බව ප්රකාශ කර ඇත.
මෙම සිදුවීමත් සමඟ පාසල් පන්ති කාමර සහ ක්රීඩා පිටිවලට ගුරුවරුන්ගේ අවධානය යොමු වුවද, වැසිකිළි වැනි “රහසිගත ස්ථාන” සිසුන්ගේ ප්රචණ්ඩ ක්රියාවලට සහ හිරිහැර කිරීම්වලට (Bullying Hotspots) විශාල මර උගුලක් වී ඇති බවට රට තුළ දැඩි කතාබහක් නිර්මාණය වී තිබේ. සිද්ධිය සම්බන්ධයෙන් පොලිසියද පරීක්ෂණ පවත්වයි.
0 Comments