වයස අවුරුදු 19ක් කියන්නේ බොහෝ දෙනෙක් තමන්ගේ උසස් අධ්‍යාපනය හෝ අනාගතය ගැන සැලසුම් කරන වයසක්. නමුත් නවසීලන්තයේ වෙලින්ටන් නුවර ජීවත්වන Claudia Hopkins කියන 19 හැවිරිදි තරුණිය තෝරාගත්තේ වෙනස්ම මාවතක්. ඇය වයස අවුරුදු 16 ඉඳන් එකතු කරපු සල්ලිවලින් “Sophia’s Real Fruit Ice Cream” නමින් ජංගම අයිස්ක්‍රීම් ව්‍යාපාරයක් ආරම්භ කළා.
ඇගේ අප්‍රතිහත ධෛර්යය නිසාම පසුගිය ගිම්හාන සෘතුවේදී ඇගේ අයිස්ක්‍රීම් කරත්තය වෙලින්ටන් වැසියන් අතර අතිශය ජනප්‍රිය වුණා. පාරිභෝගිකයන් දිගු පෝලිම්වල සිට ඇගෙන් අයිස්ක්‍රීම් මිලදී ගැනීමට පෙළඹුණේ ඇගේ ව්‍යාපාරයේ සාර්ථකත්වය කියාපාමින්.
නමුත් පසුගිය ඉරිදා උදෑසන ඇගේ මුළු ජීවිතයම උඩුයටිකුරු වුණා.තමන්ගේ අයිස්ක්‍රීම් කරත්තය නවතා තිබූ ස්ථානයට ගිය ක්ලෝඩියාට දැකගත හැකි වූයේ එය කිසිවෙකු විසින් සොරාගෙන ඇති බවයි. ව්‍යාපාරයේ නම සහ ලාංඡන විශාල ලෙස ප්‍රදර්ශනය කර තිබූ මෙම කරත්තය තුළ ඩොලර් දහස් ගණන් වටිනා අයිස්ක්‍රීම් යන්ත්‍ර සහ නවීන වාණිජ ශීතකරණ ද තිබී ඇත. හොරුන් විසින් සොරාගෙන ඇත්තේ කරත්තය පමණක් නොව, ඇය වසර ගණනාවක් තිස්සේ දුක් මහන්සියෙන් ගොඩනැගූ මුළු ව්‍යාපාරයම සහ ඇගේ ජීවනෝපායයි.
“මම ඇත්තටම බයෙන් ඉන්නේ. මම තවම ගොඩක් තරුණයි, ව්‍යාපාර ගැන ඉගෙනගන්න ගමන් වෙනස් දෙයක් කරන්න හැදුවේ. මේ වගේ දෙයක් වෙයි කියලා මම හීනෙකින්වත් හිතුවේ නැහැ,” ක්ලෝඩියා සංවේදීව පවසා සිටියාය. ඇය හොරුන්ගෙන් ඉල්ලා සිටින්නේ තමන්ගේ කරත්තය නැවත ලබාදෙන ලෙසයි.
මේ වන විට වෙලින්ටන් පොලිසිය මේ පිළිබඳව පරීක්ෂණ පවත්වන අතර, එම ව්‍යාපාරික කරත්තය හෝ ඒ ආශ්‍රිත උපකරණ පිළිබඳව කිසියම් තොරතුරක් වෙතොත් වහාම දැනුම් දෙන ලෙස මහජනතාවගෙන් ඉල්ලා සිටියි.
මෙම දරුණු කඩාවැටීම හමුවේ ක්ලෝඩියා යම් අභියෝගයකට ලක්ව සිටියත්, ඇගේ දෙමාපියන්ගේ සහය ඇතිව නැවතත් ලබන ගිම්හානයේදී ශක්තිමත්ව නැගී සිටීමට ඇය අධිෂ්ඨාන කරගෙන සිටියි.
0 Comments