ඩිජිටල් ලෝකයේ සැඟවුණු අඳුර! නවසීලන්තයේ තරුණ පරපුරෙන් හයෙන් එකක් ලිංගික හිංසනයට ගොදුරු වෙයි!

නවසීලන්තයේ තරුණ පරපුර මුහුණ දෙන බරපතල අනතුරක් හෙළි කරමින්, එරට අධ්‍යාපන සහ ශ්‍රම බලකා තේරීම් කාරක සභාව (Education and Workforce Select Committee) විසින් විශේෂ වාර්තාවක් නිකුත් කර තිබේ. එමඟින් අනාවරණය වන්නේ සෑම තරුණ තරුණියන් හය දෙනෙකුගෙන් එක් අයෙකුම (1 in 6) අන්තර්ජාලය හරහා හෝ සෘජුව ලිංගික හිංසනයන්ට සහ සූරාකෑම්වලට ලක්ව ඇති බවයි.

මෙහිදී වඩාත්ම භයානක තත්ත්වය වන්නේ නවීන ඩිජිටල් තාක්ෂණය සහ කෘත්‍රිම බුද්ධිය (AI) උපයෝගී කරගනිමින් සිදුවන හිංසනයන් ය. විශේෂයෙන්ම සාමාන්‍ය ඡායාරූප, නිරුවත් ඡායාරූප බවට ස්වයංක්‍රීයව වෙනස් කරන සදොස් “Nudify” Apps සහ ව්‍යාජ ලෙස සකසන “Deepfake” දර්ශන හරහා පාසල් වියේ පසුවන ගැහැණු ළමයින් දැඩි ලෙස අපහසුතාවයට සහ කප්පම් ඉල්ලීම්වලට (Blackmail) ලක්වන බව වාර්තා වේ.

මේ තත්ත්වය පාලනය කිරීම සඳහා පාර්ලිමේන්තු කාරක සභාව විසින් රජයට දැඩි නිර්දේශ කිහිපයක් ඉදිරිපත් කර ඇත:

🔴 කෘත්‍රිම බුද්ධිය (AI) මඟින් සකසන මෙවැනි නීතිවිරෝධී ඇප්ස් වහාම තහනම් කිරීම.

🔴 වයස අවුරුදු 16ට අඩු දරුවන්ට ප්‍රධාන සමාජ මාධ්‍ය (Social Media) භාවිතය සීමා කිරීම.

🔴 සමාජ මාධ්‍ය සමාගම් පාලනය කිරීම සඳහා ස්වාධීන ජාතික ආරක්ෂණ නියාමන ආයතනයක් පිහිටුවීම.

දත්ත වලට අනුව, පිරිමි ළමයින්ට වඩා දෙගුණයකටත් වඩා වැඩි ප්‍රමාණයක් ගැහැණු ළමයින් මෙලෙස හිංසනයට ලක්වන අතර, සමාජයට ඇති බිය නිසා ඉන් බහුතරයක් දෙනා තමන්ට සිදුවූ දේ කිසිවෙකුටත් පවසන්නේ නැත. මෙම වාර්තාවත් සමඟ තාක්ෂණික සමාගම්වල වගකීම සහ දරුවන්ගේ ආරක්ෂාව සම්බන්ධයෙන් නවසීලන්තය පුරා දැඩි සංවාදයක් මතුව තිබේ.