නවසීලන්තයේ ඕක්ලන්ඩ් නුවර Takapuna සිට Browns Bay දක්වා ධාවනය වූ මගී බස් රථයක් තුළදී පුද්ගලයෙකු ඉලක්ක කර ගනිමින් එල්ල වූ අමානුෂික ප්‍රහාරයක් හේතුවෙන් එරට පොදු ප්‍රවාහන සේවයේ ආරක්ෂාව පිළිබඳව දැඩි කතාබහක් නිර්මාණය වී තිබේ.
කිසිදු හේතුවක් නොමැතිව බස් රථය තුළදී සිදුකළ මෙම පහරදීමෙන් එක් මගියෙකු තුවාල ලබා වෛද්‍ය ප්‍රතිකාර සඳහා යොමු කර ඇති අතර, සිද්ධියෙන් අනෙක් මගීන් ද දැඩි ලෙස බියට පත්ව ඇත. මෙම ප්‍රහාරයෙන් පසු සැකකරු පළා ගොස් තිබේ.
බස් රථයේ සවිකර තිබූ ආරක්ෂිත කැමරාවල (CCTV) සටහන් වූ දර්ශන ඇසුරින් Waitematā පොලිසිය විසින් සැකකරුගේ පැහැදිලි ඡායාරූපයක් මාධ්‍ය වෙත මුදාහැර ඇත. පින්තූරයේ සිටින පුද්ගලයා හඳුනන හෝ එදින එම බස් රථයේ ගමන් කරමින් සිද්ධිය ඇසින් දුටු අයෙක් සිටී නම් වහාම පොලිස් හදිසි ඇමතුම් අංක වෙත තොරතුරු ලබාදෙන ලෙස පොලිසිය ජනතාවගෙන් ඉල්ලා සිටියි.
ඕක්ලන්ඩ් නුවර බස් සහ දුම්රිය සේවාවන් තුළ මෑතකදී ප්‍රචණ්ඩකාරී සිදුවීම් කිහිපයක්ම වාර්තා වීම නිසා, පොදු ප්‍රවාහන පද්ධතිය තුළ ආරක්ෂක නිලධාරීන් වැඩි කිරීමට ද බලධාරීන්ගේ අවධානය යොමුව තිබේ.
0 Comments