පාපැදියෙන් ඇවිත් අලුයම කළ මහා කලා සොරකම! නවසීලන්තයෙන් වාර්තා වූ අපූරු සිදුවීමක්!

රැයේ ඝන අඳුර අස්සේ පාපැදියකින් පැමිණි පුද්ගලයෙකු විසින් නවසීලන්තයේ සුප්‍රකට කලාගාරයක තිබූ අතිවිශේෂ කැටයම් මූර්තියක් සොරාගැනීමේ පුවතක් මාධ්‍ය ඔස්සේ වාර්තා වනවා. නවසීලන්තයේ Whangārei හි පිහිටි Hundertwasser Art Centre හි එළිමහන් ප්‍රදර්ශන භූමියේ සවි කර තිබූ, Tiori Toru හෙවත් ‘හඬවල් තුන’ ලෙස නම් කර ඇති මෙම අගනා නිර්මාණය අගෝස්තු 24 වන දින අලුයම 3:15 ට පමණ මෙසේ සොරාගෙන තිබෙනවා.

විශාල ගල් පාදමකට සවි කර තිබූ මීටර් 1.4 ක් උසැති මෙම මූර්තිය ඉතා කෙටි වේලාවක් ඇතුළත ගලවාගත් සැකකරු, එය අතින් අල්ලාගෙන පාපැදිය පැදගෙන යන අයුරු ආරක්ෂිත කැමරාවල සටහන්ව තිබෙනවා.

කැරින් ඩි බියර් (Karin de Beer) නැමැති ශිල්පිනිය විසින් පෝහුටුකාවා (pōhutukawa) දැවයෙන් සහ වීදුරු මෝස්තර එකතු කරමින් නිර්මාණය කරන ලද මෙම මූර්තියෙන් නවසීලන්තයේ දේශීය පක්ෂීන් තිදෙනෙකු නිරූපණය කෙරෙනවා. අගෝස්තු මස මුලදී ප්‍රදර්ශනයට තැබූ මෙම නිර්මාණය, ආලෝකය වැටෙන විට විවිධ වර්ණ රටා මවන අපූරු කලා නිර්මාණයක් ලෙස ජනප්‍රියව පැවතුණා. සොරකම සිදුවූ ආකාරය පිළිබඳ අදහස් දක්වන කලා මධ්‍යස්ථානයේ අධ්‍යක්ෂ යූස්ට් ඩි බ්‍රයන් (Joost de Bruin) සඳහන් කරන්නේ මෙය හදිසියේ කළ එකක් නොව කල්තියා සැලසුම් කර ඉතා දක්ෂ ලෙස සිදුකරන ලද්දක් බවයි.

කෙසේ වෙතත්, අදාළ මූර්තිය ආරක්ෂිතව ආපසු ලබාදෙන්නේ නම් එය භාරගැනීමට සූදානම් බවත්, ඒ සම්බන්ධයෙන් කිසිදු ප්‍රශ්න කිරීමක් සිදු නොකරන බවත් කලාගාර බලධාරීන් ප්‍රකාශ කර සිටිනවා. මේ අතර Northland Police විසින් විශේෂ පරීක්ෂණයක් ආරම්භ කර ඇති අතර, අංක 260824/0597 යටතේ 105 දුරකථන අංකය ඔස්සේ හෝ 0800 555 111 හරහා රහසිගතව පොලිසියට තොරතුරු ලබාදෙන ලෙස මහජනතාවගෙන් ඉල්ලා සිටිනවා.