නවසීලන්තයේ විදුලි වාහන වෙළෙඳපොළ රජ කරන චීන නිෂ්පාදන!

නවසීලන්තයේ අලුත්ම වාහන වෙළෙඳපොළ තුළ වසර ගණනාවක් පුරා පැවැති යුරෝපීය වාහනවල ආධිපත්‍යයට දැඩි අභියෝගයක් එල්ල කරමින්, චීන නිෂ්පාදිත වාහන කෙරෙහි පාරිභෝගිකයන්ගේ අවධානය ශීඝ්‍රයෙන් ඉහළ යමින් පවතින බව අනාවරණය වේ.

‘Trade Me’ ආයතනය විසින් සිදුකරන ලද අලුත්ම පාරිභෝගික සමීක්ෂණ වාර්තාවකට (Cars Consumer Insights Report) අනුව, අලුතින් වාහනයක් මිලදී ගැනීමට බලාපොරොත්තු වන නවසීලන්ත වැසියන්ගෙන් තුනෙන් එකක්ම (33%) චීන වාහන සලකා බලන අතර, එය යුරෝපීය වාහන සඳහා පවතින 29% ක ප්‍රතිශතය මෙන්ම ඇමෙරිකානු වාහන සඳහා වන 15% ක ප්‍රතිශතය ද අභිබවා යාම විශේෂත්වයකි.

BYD, MG, GWM, සහ Haval වැනි චීන සමාගම් විසින් සාධාරණ මිල ගණන් යටතේ උසස් තාක්ෂණයෙන් සහ දීර්ඝ කාලීන වගකීම් සහතිකවලින් (warranties) යුත් වාහන වෙළෙඳපොළට නිකුත් කිරීම මෙම වෙනසට ප්‍රධානතම හේතුව වී තිබේ.

ජීවන වියදම ඉහළ යාම හමුවේ දැරිය හැකි මිලකට උසස් ආරක්ෂිත විශේෂාංග සහිත ප්ලගින් හයිබ්‍රිඩ් (PHEV) සහ විදුලි වාහන (EV) ලබා ගැනීමට හැකිවීම නිසා BYD Atto 3 වැනි චීන මාදිලි එරට ජනප්‍රියතාවයෙන් ඉහළටම පැමිණ ඇති අතර, නවසීලන්තයේ වැඩිම අලෙවියක් සහිත විදුලි වාහන 15 න් 12 ක්ම චීන නිෂ්පාදන වීම ද කැපී පෙනේ.

යුරෝපීය වාහන සඳහා අධික මිලක් සහ නඩත්තු පිරිවැයක් දැරීමට සිදුවීම නිසා පාරිභෝගිකයන් මෙලෙස චීන වාහන වෙත යොමු වන අතර, ANCAP ආරක්ෂිත ඇගයීම්වලින් තරු 5 ලබාගනිමින් විශ්වාසනීයත්වය තහවුරු කිරීමට ද චීන සමාගම් සමත්ව ඇත.

කෙසේ වෙතත්, අලුත් වාහන වෙළෙඳපොළ තුළ චීන වාහන මෙලෙස පෙරළියක් සිදු කළද, පාවිච්චි කළ වාහන (used cars) වෙළෙඳපොළ තුළ බැටරි ආයු කාලය සහ නැවත අලෙවි කිරීමේ අගය (resale value) පිළිබඳ ඇති අවිනිශ්චිතතාව නිසා තවමත් ජපන් වාහන සඳහා වැඩි ඉල්ලුමක් පවතින බව ද අදාළ වාර්තාව වැඩිදුරටත් පෙන්වා දෙයි.