නවසීලන්තයේ Waitematā Harbour හරහා ඉදිකිරීමට යෝජිත දෙවන පාලම් ව්‍යාපෘතිය සඳහා වන අවසන් තීරණය 2027 වසර දක්වා කල් දැමීමට නවසීලන්ත රජය පියවර ගෙන තිබේ. මීට පෙර නවසීලන්ත ප්‍රවාහන නියෝජිතායතනය (NZTA) විසින් යෝජනා කළ උමං මාර්ග සැලැස්ම (tunnel alignment) සෘජුවම අනුමත කිරීම වෙනුවට, රජය විසින්ම මෙහෙයවන නව පූර්ණ ව්‍යාපාරික වාර්තාවක් කැඳවීමට අගමැති ක්‍රිස්ටෝෆර් ලක්සන් (Christopher Luxon) සහ ප්‍රවාහන අමාත්‍ය ක්‍රිස් බිෂොප් (Chris Bishop) ප්‍රමුඛ අමාත්‍ය මණ්ඩලය තීරණය කර ඇත. 1959 වසරේදී ඉදිවූ වත්මන් ඔක්ලන්ඩ් වරාය පාලම හරහා දිනපතා වාහන 170,000ක් පමණ ගමන් කරන අතර, ඉදිරියේදී සිදුවන නඩත්තු කටයුතු හමුවේ පාලම වසා තැබීමට සිදුවුවහොත් එරට ආර්ථිකයට ඩොලර් බිලියන 4.8ක දැවැන්ත පාඩුවක් සිදුවීමේ අවදානමක් පවතී.

මෙම අලුත් තීරණයත් සමඟ, නවසීලන්ත ප්‍රවාහන නියෝජිතායතනය සතුව තිබූ ව්‍යාපෘති මෙහෙයවීමේ බලතල අමාත්‍ය මණ්ඩලය යටතට ගෙන ඇති අතර, ඔක්ලන්ඩ් සභාවේ සභාපතිත්වයෙන් 2027 වන විට මෙම අධ්‍යයනය නිම කිරීමට නියමිතය. මෙම ප්‍රමාදයට හේතු දක්වමින් ප්‍රවාහන අමාත්‍යවරයා සඳහන් කළේ, අතීතයේදී නිසි පිරිවැය ගණනය කිරීමකින් තොරව ගත් දේශපාලනික තීරණ මෙන් නොව, ඉදිකිරීම් පිරිවැය, මූල්‍ය ප්‍රතිපාදන සහ වෙනත් මාර්ග විකල්ප පිළිබඳව පූර්ණ පරීක්ෂාවකින් පසුව අවසන් තීරණයට එළඹෙන බවයි. ඒ අනුව, ඔක්ලන්ඩ් නගරපති වේන් බ්‍රවුන් (Wayne Brown) යෝජනා කළ Meola Reef හරහා යන පාලම් විකල්පය මෙන්ම පවතින පාලම ශක්තිමත් කිරීමට පෞද්ගලික අංශයෙන් ලැබී ඇති යෝජනාවන්ද මෙම නව අධ්‍යයනයට ඇතුළත් කෙරේ. කෙසේ වෙතත්, 2027 වසරේ පැවැත්වෙන ඡන්දයෙන් පසුව පමණක් අවසන් තීරණය ගැනෙන බැවින්, මෙම දැවැන්ත ව්‍යාපෘතියේ ඉදිකිරීම් ආරම්භ වනු ඇත්තේ 2030 දශකය තුළදීය.